QR ІІM Tergeý komıteti «Gúlnár týr» kompanııasy basshylyǵynyń alaıaqtyq is-áreketin tergeýde
ASTANA. QazAqparat - QR Іshki ister mınıstrliginiń Tergeý komıteti «Gúlnár týr» kompanııasy basshylyǵynyń alaıaqtyq is-áreketine qatysty tergeý amaldaryn júrgizýde, dep habarlady atalǵan vedomstvonyń baspasóz qyzmetinen.
«Gúlnár týr» týrıstik kompanııasy basshylyǵy tarabynan alaıaqtyq is-áreketterdiń oryn alý faktisi boıynsha qylmystyq isti tergeýdi QR ІІM-niń Tergeý komıteti júrgizýde. Týrıstik kompanııaǵa qatysty azamattardan aryzdar túsip jatyr. Keltirilgen zııan somasy anyqtalýda», - delingen habarlamada.
Sonymen qatar vedomstvo anyqtalǵan faktiler men atalǵan istiń mán-jaıy týraly tolyqqandy aqparat tergeý múddesine oraı taratylmaıtyndyǵyn eskertip otyr.
Esterińizge sala keteıik, osydan biraz buryn «Gúlnár týr» týroperatorynyń júzden astam klıentteri Túrkııa men Qazaqstan áýejaılarynan usha almaı qalǵan edi. Azamattyq avıatsııa komıtetiniń málimeti boıynsha, «Gúlnár týrdyń» Jet Airlines áýe kompanııasy ushaǵyn paıdalanýǵa ruqsaty tek 30 maýsymǵa deıin ǵana bolǵan. Biraq soǵan qaramastan týroperator shilde aıynyń reısterine de bılet satýdy jalǵastyryp kelgen. «Gúlnár týr» fırmasynyń týrısterge keltirgen shyǵyny 30 mln. teńgeden asa somaǵa baǵalanýda.
