QR ІІM Tarazda qarýly qylmyskerdiń qolynan jaralanǵan polıtsııa serjantyn shetelde emdetti
ASTANA. QazAqparat - Tarazda qarýly qylmyskerdi ustaý barysynda jaralanǵan polıtsııa serjanty shetelde memleket qarjysy esebinen emdelip, búgin elge oralady.
Bul jaıynda QR Іshki ister mınıstrligi Memlekettik til jáne aqparat departamentiniń dırektory Almas Sádýbaev Feısbýktegi óziniń paraqshasynda jazdy, dep habarlaıdy QazAqparat.
«2016 jyldyń maýsym aıynda qarýly qylmyskerdi ustaý barysynda Taraz qalalyq ІІB jol-patrýldeý polıtsııasy batalonynyń polıtseıi, serjant Bekjan Tilenshıev aýyr jaraqat aldy. Oǵan birneshe kúrdeli ota jasaldy. Alaıda, oq jaraqatynyń saldaryn joıyp, qozǵalý qyzmetin qalpyna keltirý múmkin bolmady. Osyǵan oraı Іshki ister mınıstrligi Úkimette Tilenshıevti shetelde emdeý týraly bastama kóterdi. Ol bir aı boıy Grekııada bıýdjet qarjysy esebinen em aldy. Búgin, 1 naýryzda batyr Otanyna oralady. Oǵan myqty densaýlyq jáne tezirek saýyǵyp ketýin tileımiz!», - dep jazdy Almas Sádýbaev.
Eske salsaq, ótken jyldyń 19 maýsymynda qalanyń 6-shy shaǵynaýdanynda ýchaskeni torýyldaý kezinde Tarazdyń ishki ister basqarmasynyń polıtsııa serjanty Bekjan Tilenshıev kóp qabatty úıdiń kireberisine kirip ketken qarýly qylmyskerdiń izine túsip, ózi oqqa ushqan bolatyn.
