QR ІІM Sıngapýrda isti bolǵan qazaqstandyqtyń sotyna qatysty túsinik berdi
ASTANA. QazAqparat - Qazaqstandyq dıplomattardyń kúsh-jigeriniń arqasynda Sıngapýrdyń polıtsııa ofıtserine para bermek boldy dep aıyptalǵan Elena Kalýgınanyń jaza merzimi qysqartyldy, dep habarlaıdy QazAqparat.
QR Syrtqy ister mınıstrligi baspasóz qyzmetiniń jetekshisi Ánýar Jaınaqovtyń aıtýynsha, 1990 jyly dúnıege kelgen otandasymyzdyń ustalǵandyǵyn Sıngapýrdyń Jemqorlyqqa qarsy is-qımyl bıýrosy 29 maýsym kúni Sıngapýrdaǵy Qazaqstan Elshiligine habarlaǵan. Oǵan polıtsııa ofıtserine 2150 sıngapýr dollary (shamamen 1,5 myń AQSh dollary) kóleminde para bermek boldy degen aıyp taǵylǵan.
Ánýar Jaınaqovtyń aıtýynsha, sol kúni Qazaqstan konsýly ustalǵan azamatshamen kezdesip, is materıaldarymen tanysqan. Qazaqstandyq dıplomat oǵan bilikti advokat, sonymen qatar kepilger de taýyp bergen. Aıta keterligi, sot tyńdaýlarynyń birinde oǵan kepilmen shyǵýǵa usynys jasalǵan. Al Sıngapýr zańnamasyna sáıkes kepildi sol eldiń azamaty ǵana engize alady. Ustalǵan qazaqstandyqtyń ol elde tanysy bolmaýyna baılanysty qazaqstandyq dıplomattar kepilger taýyp bergen. Ol 5 myń sıngapýr dollary (3600 AQSh dollary) somasynda kepil usynǵan. 3 shildede ol eshqaıda ketpeý týraly qolhatpen bostandyqqa shyqty.
SІM ókiliniń atap ótýine qaraǵanda, birinshi sot tyńdaýynda qazaqstandyq óz kinásin moıyndaýdan bas tartqan. Al ekinshi sot tyńdaýy keıinge shegerilgen. Tek 17 shildede ótken úshinshi sot tyńdaýy barysynda ǵana Elena Kalýgına óz kinásin moıyndap, sot ony Sıngapýrdyń áıelder kollonııasyna 30 kúnge bas bostandyǵynan aıyrý úkimin shyǵarǵan.
«Osy rette bizdiń dıplomattardyń rólin aıryqsha atap ótkim keledi. Ózderińiz de biletindeı, Sıngapýrda jemqorlyqqa qarsy zańnama barynsha qatań. Ol 5 jylǵa deıingi merzimge qamalýy múmkin edi. Degenmen, bizdiń dıplomattar bilikti advokattardy tańdap alýy arqyly bul merzimdi tómendetip otyr. Oǵan 30 kúnge bas bostandyǵynan aıyrý úkimi shyǵaryldy. Buǵan qosa, bul eldiń zańnamasyna sáıkes bizdiń azamatshamyz jaz merziminiń úshten ekisin, ıaǵnı, 18 kúnin ótkizgennen keıin merziminen buryn shartty túrde bosap shyǵa da alady. Jazany óteý merzimi úkim shyǵarylǵan kúnnen bastap, ıaǵnı 17 shildeden esteptelinedi. Bizdiń dıplomattarymyz sottalýshynyń týystarymen jáne jaqyndarymen turaqty baılanysyp otyr. Olar sot sheshimi týraly aqparatty estidi», - dedi Ánýar Jaınaqov.
Aıta keteıik, Qazaqstan azamatshasy ınspektor Lo Hýn ıÝege ony tutqynǵa almaýy úshin 2150 dollar AQSh dollaryn usynǵanyn moıyndaǵan bolatyn. Okrýgtik sottyń deregi boıynsha, ınspektor Lo Hýn ıÝe men Ksaveniń shtab-serjanty Seo Hýn Ge Royal otelinde boljam boıynsha zańsyz vıza áreketteri týraly habarlamany tekserý úshin Kalýgınanyń nómirine barady. Tergeý kezinde ol bosatýlaryn surap, jalynady jáne bas barmaǵy men suq saýsaǵyn úıkep, ymmen aqsha usynady. Inspektor óz kezeginde paranyń qylmys ekenin eskertip, onyń bul áreketi kameraǵa túsiriletinin aıtady. Alaıda áıel ısharatpen ǵana shektelmeı, nómirdegi jyljymaly jáshikti ashyp, aqsha usynyp, kelesi reıspen úıine ushýǵa ýáde etip, jiberýin ótinedi. Inspektor bul usynystan bas tartyp, ony tutqyndaıdy.
Sottyń shyǵarǵan jazasy jeńil ekeni aıtylýda. Sebebi mundaı qylmys úshin qazaqstandyqqa 100 myń dollar aıyppul salynyp, jemqorlyq úshin bes jylǵa deıin bas bostandyǵynan aıyrý qaýpi tóngen edi.
