QR ІІM polıtsııa qyzmetkerleriniń ústinen túsken shaǵymdar týraly málimet berdi

NUR-SULTAN. QazAqparat – Іshki ister mınıstrliginiń resmı ókili Nurdildá Oraz onlaın brıfıngide polıtsııa qyzmetkerleriniń ústinen túsken shaǵymdar týraly málimet berdi, dep habarlaıdy QazAqparat tilshisi.

«ІІM «senim telefony» keń aýqymdy máseleler boıynsha halyqpen keri baılanystyń turaqty arnasyna aınaldy. Ótken 17-23 qańtar aralyǵynda ǵana 544 habarlama kelip tústi. Onyń ishinde 448 habarlama konsýltatıvtik-anyqtamalyq sıpatta boldy. Habarlamanyń árqaısysyna túsiniktemeler, usynymdar berilip, qalyptasqan mán-jaılardy sheshýdiń joldary usynyldy», - dedi Nurdildá Oraz.

Onyń aıtýynsha, polıtsııa qyzmetkerleriniń áreketterine birneshe sıpattaǵy shaǵymdar túsken. Azamattardy ustaý jáne jetkizýdiń 46 faktisi boıynsha shaǵym kelgen. Onyń ishinde ustalǵan týystaryn izdegen 18 ótinish túsken.

«Árbir ótinish berýshige ustaýdyń sebepteri, zań buzýshylyqtyń máni jáne qamaýdaǵy týysymen baılanysý tásilderi túsindiriledi. Uıaly telefondardy tekserýdiń 28 faktisi boıynsha shaǵym keldi. QR Qylmystyq kodeksiniń 255-baby, (terrorızm aktisi), 269-baby (ǵımarat pen qurylysqa shabýyl), jáne 272-baby (jappaı tártipsizdik) baby boıynsha sotqa deıingi tergeý aıasynda barlyq telefondar tárkilengeni anyqtaldy. Ruqsat etilgen tekserýden keıin olardyń múlki qaıtarylatyny habarlandy», - dedi Іshki ister mınıstrliginiń resmı ókili.

Aıtýynsha, joǵaryda atalǵan ár fakti boıynsha qyzmettik tergeýler júrip jatyr.

«ІІM «senim telefonyna» kelip túsken habarlamalardy qaraýdyń merzimi 3-6 saǵattan aspaıdy. Tekserý úshin ýaqytty qajet etetin jekelegen máseleler boıynsha azamattarǵa tirkeý boıynsha qabyldanǵan birinshi kezektegi sharalar týraly, sondaı-aq tekserý nátıjeleri qashan aıtylatyny túsindiriledi», - dep túsindirdi Nurdildá Oraz.