QR ІІM polıtseılerge qandaı jaǵdaıda qarý qoldanýǵa ruqsat etilgenin túsindirdi
ASTANA. QazAqparat - Qazaqstan Respýblıkasy Іshki ister mınıstrligi polıtseıler atys qarýyn qandaı jaǵdaılarda qoldana alatyndyǵyn túsindirip berdi.
«Qazaqstan Respýblıkasy ishki ister organdarynyń qyzmetkerleri atys qarýyn jáne ózge de qarýdy «Quqyq qorǵaý qyzmeti týraly» Qazaqstan Respýblıkasynyń 2011 jylǵy 6 qańtardaǵy Zańynyń 61-babyna sáıkes qoldanady», - delingen «QazAqparat» tilshisine berilgen resmı jaýapta.
Atap aıtqanda, mınıstrliktiń habarlaýynsha, ishki ister organdarynyń qyzmetkerleri atys qarýyn jáne ózge de qarýdy jeke adamdardyń ómiri men densaýlyǵyna qater tóngen jaǵdaıda olardy qylmystyq qol suǵýshylyqtan qorǵaý, sol sııaqty kepilge alynǵandardy bosatý;
qyzmetkerlerge jáne olardyń otbasy múshelerine, qoǵamdyq tártipti qorǵaý, qoǵamdyq qaýipsizdikti qamtamasyz etý jáne qylmystylyqqa qarsy is-qımyl jasaý jónindegi qyzmettik nemese qoǵamdyq boryshyn atqaryp júrgen adamdarǵa jasalǵan shabýylǵa toıtarys berý;
quqyq qorǵaý organynyń atys qarýyn jáne ózge de qarýdy, arnaıy kólik quralyn tartyp alý áreketteriniń jolyn kesý;
jeke tulǵalardyń turǵyn úı-jaılaryna, quqyq qorǵaý organdary kúzetetin obektilerge, memlekettik uıymdardyń úı-jaılaryna jasalǵan shabýylǵa toıtarys berý, qyzmettik nemese áskerı narıadqa jasalǵan shabýylǵa toıtarys berý;
qarsylyq kórsetetin ne qylmys jasaý kezinde ústinen túsken, qamaýdan qashqan adamdardy (ákimshilik qamaqta ustalatyndardan basqa) ustaý, qarýlanǵan adamdardy ustaý;
eger kólik júrgizýshi qyzmetkerdiń zańdy talaptaryna baǵynbasa jáne jeke adamdardyń ómiri men densaýlyǵyna qater tóndirse, kólik quraldaryna aqaý keltirý arqyly olardy toqtatý;
adam ómirine nemese densaýlyǵyna is júzinde qater tóndirgen jaǵdaılarda haıýanattardyń shabýylynan qorǵaný;
qarý qoldaný nıeti týraly azamattarǵa eskertý, dabyl sıgnalyn berý nemese kómekke shaqyrý kezinde qoldanady.
Sonymen qatar, qajetti qorǵanystyń jáne asa qajettiliktiń barlyq ózge de jaǵdaılarynda ishki ister organdary qyzmetkerleriniń atys qarýyn jáne ózge de qarýdy qoldanýǵa quqyǵy bar.
«Іshki ister organdarynyń qyzmetkerleriniń atys qarýyn jáne ózge de qarýdy qodanýǵa tyıym salynatyn jaǵdaılar bar. Bul rette áıelderge, anyq múgedektik belgileri bar adamdarǵa, jasy belgili nemese anyq bolǵan kezde kámeletke tolmaǵandarǵa qatysty, olar qarýly shabýyl jasaǵan, qarýly qarsylyq kórsetken, adamdardy kepilge, kólik quraldaryn, onyń ishinde áýe kemesin basyp alǵan ne toptasyp shabýyl jasaǵan jaǵdaılardy qospaǵanda, qarý qoldanýǵa tyıym salynady», - delingen habarlamada.
