QR ІІM Ózindik qaýipsizdik qyzmeti kúsheıtiledi

ASTANA. QazAqparat - QR Іshki ister mınıstrliginiń Ózindik qaýipsizdik qyzmeti kúsheıtiledi. Bul týraly búgin «Quqyq qorǵaý organdary qyzmetiniń ashyqtyǵy» atty konferentsııa barysynda  QR ІІM janyndaǵy Qoǵamdyq keńes tóraǵasy Marat Qoǵamov málim etti, dep habarlaıdy QazAqparat tilshisi.

Onyń aıtýynsha, búginde Úkimettiń qaraýynda jatqan ishki ister organdaryn jańǵyrtý jónindegi jol kartasynda  jemqorlyqqa qarsy is-qımyl máselelerine arnalǵan jeke bólim bar.

«Polıtseıler keıde jemqorlyq áreketke baryp jatady. Mundaı oqıǵalar kezdesedi jáne olar sot tájirıbesindegi quqyqtyq, qylmystyq statıstıkalarda bar. Sondyqtan eń aldymen polıtsııa kórsetetin barlyq memlekettik organdardy barynsha avtomattandyrý kerek. Polıtsııanyń kóptegen bólimsheleri halyqqa memlekettik qyzmetpen aınalysady. Demek, atalǵan protsesterdi avtomattandyrý polıtsııa qyzmetkerlerine naqty qyzmet alýshydan bólekteıdi»,  - dedi ol.

Qoǵamdyq keńes tóraǵasynyń aıtýynsha, tártiptik jaýapkershilik máselesi de qatańdatylady.

«Tártiptik jaýapkershilik kúsheıtilip, baǵynyshty qyzmetkeri adamgershilik, zań normalarynan burys ketse, birinshi basshysy da, quqyq buzýshy da qatań jaýapqa tartylady», - dedi Marat Qoǵamov.

Osy rette ol ishki ister organdaryndaǵy ózindik qaýipsizdik qyzmeti kúsheıtiletindigin basa aıtty.

«Jol kartasynyń jobasynda Іshki ister mınıstrliginiń ishki, ózindik qaýipsizdik qyzmetin kúsheıtý jáne damytýǵa basa mán berilgen. Olar polıtsııa qataryndaǵy jemqorlarmen kúresip, adal qyzmetkerlerdi qylmysty ashý jáne tergeý barysynda quqyqqa qaıshy áreketterden qorǵaıdy», - dedi ol.