QR ІІM mýzeıinde general Rústem Qaıdarovqa arnalǵan ekspozıtsııa ashyldy
Rústem Qaıdarov 2019 jyldyń 27 jeltoqsanynda Almaty mańynda apatqa ushyraǵan ushaq jolaýshylary arasynda qaza tapqan edi.
Ekspozıtsııaǵa generaldyń fotosýretteri, túrli qujattary men jeke buıymdary, formasy qoıylǵan. Áıgili generaldy eske alý sharasyna QR ІІM basshylyǵy, ishki ister organdary ardagerler keńesiniń músheleri jáne Rústem Qaıdarovtyń týystary men jaqyndary qatysty.
«Búgin memleket qaıratkeri, general-maıor Rústem Qaıdarovty eske alýǵa jınaldyq. Rústem Esimhanuly 1940 jyly 18 mamyrda dúnıege kelgen. 16 jasynan jumys istep, traktorshy, júk tıeýshi, aǵash kesýshi bolǵan. 18 jasynda áskerge shaqyrylyp, Baıkal mańy aýdandyq okrýginde boryshyn ótegen. Áskerden soń ishki ister organdarynyń oqýyna tústi. 1970 jyly QazMÝ-da joǵarǵy quqyqtyq bilimin aldy», - dedi QR Іshki ister mınıstriniń orynbasary Alekseı Kalaıchıdı.
Alekseı Kalaıchıdı Rústem Qaıdarovtyń óz mamandyǵynyń jáne tutas eliniń patrıoty bolǵanyn atap ótti.
«Onyń kásibı jáne adamdyq qasıetteri týraly qyzmettesteri jaqsy pikirde. Ol únemi qaramaǵyndaǵy mamandar men áriptesteriniń jaǵdaıyn jasady. Eń kúrdeli jaǵdaılarda, ásirese adam taǵdyry sheshiler sátterde durys sheshim taba bildi. Ol Semeı oblysynyń ishki ister bóliminde basshynyń orynbasary, Jezqazǵan oblysynda bólim basshysy boldy. Jumysqa úlken talappen qarap, qyzmetkerleriniń áleýmettik máselelerin sheshýge kúsh saldy», - dedi A. Kalaıchıdı.
Sonymen birge, ІІM mýzeıinde «Eren eńbegi eline. General Qaıdarov» atty kitaptyń tusaýy kesildi. Jınaqta Rústem Qaıdarovtyń áriptesteri men qyzmettesteri óz estelikterin jazǵan.
«Rústem Esimhanuly bar ǵumyryn týǵan halqyna qyzmet etýge arnaǵan talantty, talmaıtyn eńbekqor jan retinde el esinde qaldy. Ol ishki jan dúnıesi baı, rýhy joǵary, qyzmet tártibine berik adam edi. Rústem Qaıdarov qatardaǵy mılıtsııa qyzmetkerinen generalǵa deıingi qıyn joldan ótti. Qazaqstannyń zań ǵylymynyń damýyna zor úles qosyp, talantty shákirtterdi tárbıeledi. Qyzmettik demalysqa shyqqan soń da ol quqyq qorǵaý júıesinde belsendi qyzmet atqardy, ómiriniń sońyna deıin «Generaldar keńesi» RQB Prezıdıýmy tóraǵasy mindetin abyroımen atqardy. Tiri bolǵanda Rústem Qaıdarov 2020 jyldyń 18 mamyrynda 80 jasqa tolar edi», - dedi Ulttyq ulannyń ardagerler keńesiniń tóraǵasy Ómirzaq Bolsambekov.
Sonymen birge Almaty qalasy Polıtsııa departamenti, Shyǵys Qazaqstan oblysy Semeı qalasy Polıtsııa basqarmasy, Qaraǵandy oblysy Jezqazǵan qalasy Polıtsııa basqarmasyndaǵy mýzeılerde general Rústem Qaıdarov týraly estelik buryshy saltanatty túrde ashyldy.
