QR ІІM mınıstrlik tarapynan kórsetiletin suranysqa ıe qyzmet túrlerin jarııalady

Baspasóz málimetterine qaraǵanda, búginde ishki ister organdary kórsetetin 40 qyzmettiń 38-i (95%) avtomattandyrylǵan. 2020 jyly ishki ister organdary 8 mln. 937 myń memlekettik qyzmet kórsetti.

Onyń ishinde 8,5 mln-nan astam qyzmetti azamattar egov.kz portaly arqyly, sondaı-aq Halyqqa qyzmet kórsetý ortalyqtarynda elektrondy túrde aldy. Tek polıtsııa bólimshelerine júgingen kezde ǵana 387,5 myń qyzmet qaǵaz túrinde kórsetilgen.

Osynyń ishinde avtokólikti tirkeý (2 mln. 366 myń), jeke basty kýálandyratyn qujattardy berý (2 mln. 253 myń) jáne júrgizýshi kýálikterin berý (986 myń), sondaı-aq azamattardy turǵylyqty jeri boıynsha tirkeý (2 mln. 067 myń) eń kóp suranysqa ıe qyzmetter bolyp sanalady.

Vedomstvo ókilderi atap ótkendeı, tsıfrlandyrý jumys tıimdiligin arttyrady, protsesterdi jeńildetedi jáne azamattarǵa memlekettik qyzmetterdi usyný merzimderin qysqartady, sondaı-aq qyzmetkerlerdiń halyqpen tikeleı baılanysyn boldyrmaıdy jáne sybaılas jemqorlyq qaýpin tómendetedi.

Іshki ister mınıstri Erlan Turǵymbaev ІІM-niń Memlekettik qyzmet kórsetý salasyndaǵy eń basty ustanymy – qyzmetterdi avtomattandyrý, jedeldigin arttyrý, ashyqtyǵyn qamtamasyz etý jáne sybaılas jemqorlyqty azaıtý bolyp tabylatynyn atap ótti.

«Búginde bizdiń barlyq áreketimiz memlekettik qyzmetterdiń sapasyn jetildirýge baǵyttalǵan. Eń bastysy, adamdar olardy úıden nemese keńseden shyqpaı-aq tez jáne eshqandaı áýrege túspeı ala alady. Sonymen qatar, sheshim qabyldaýdyń árbir kezeńinde ýaqytyly jáne obektıvti oryndalýyn qadaǵalaý kerek», - dep atap ótti vedomstvo basshysy.

Budan basqa, tsıfrlandyrý qyzmetterdi birtutas kórsetýge múmkindik beredi, ıaǵnı bir ótinish boıynsha birden ózara baılanysty birneshe qyzmetterdi alýǵa bolady (barlyǵy 9 qyzmet túri, olardyń 7-i 2020 jyly engizilgen).

Osylaısha, eńbek mıgranttaryna azamattardyń úı sharýashylyǵynda jumys isteýine ruqsat berýmen qatar («eńbek patenti» dep atalatyn), olarǵa JSN jáne ýaqytsha turýǵa ruqsat rásimdeledi. Buryn bul qyzmetterdiń árqaısysy bólek kórsetiletin.

Esepter men málimetterdi avtomattandyrý, ártúrli memlekettik organdardyń aqparattyq júıelerin yqpaldastyrý vedomstvo kórsetetin birqatar qyzmetti joıýǵa múmkindik berdi.

Mysaly, 2019 jylǵy 1 qarashadan bastap turǵylyqty jerinen meken-jaı anyqtamasyn berý joıyldy (jyl saıyn 10 mln-ǵa deıin berildi), 2020 jyldyń qańtar aıynda elde ýaqytsha bolatyn sheteldikterdi tirkeý toqtatyldy (jyl saıyn 1,2-1,6 mln).

Endi bul málimetterdi memlekettik organdar tikeleı aqparattyq júıelerden, al azamattar smartfondardaǵy mobıldi qosymshalar arqyly alady.

Polıtsııanyń tirkeý-emtıhan bólinisteri qysqartyldy, endi avtokólikterdi esepten shyǵarý jáne tirkeý, memlekettik nómir belgisin tańdaý jáne daıyn qujattardy jetkizýge tapsyrys berý qashyqtan júzege asyrylady, ІІM bazalary boıynsha barlyq tekserýler avtomattandyrylǵan.

Іshki ister organdary júıesinde memlekettik qyzmet kórsetý protsesterin ońaılatý, olardyń sapasy men halyqqa qoljetimdiligin arttyrý, ákimshilik kedergiler men sybaılas jemqorlyq týǵyzatyn jaǵdaılardy boldyrmaý jónindegi jumystar jalǵasa beredi.