QR ІІM Kóliktegi polıtsııa departamenti qurylymynda 300-ge jýyq arý qyzmet etedi
NUR-SULTAN. QazAqparat – Halyqaralyq áıelder kúni qarsańynda QR ІІM Kóliktegi polıtsııa departamenti názik jandy úzdik qyzmetkerleri týraly baıandady, dep habarlaıdy QazAqparat.
Úıde besik terbetken ana, qyzmette qarý ustaǵan saqshylar
QR ІІM Kóliktegi polıtsııa departamenti men onyń jelilik bólinisterinde búgingi kúni 300-ge jýyq arý qyzmet etedi. Olar el aýmaǵynda ornalasqan áýe jáne temir jol nysandaryndaǵy quqyqtyq tártipti qamtamasyz etedi. Qystyń qytymyr sýyǵyna, jazdyń aptap ystyǵyna qaramastan qoǵam qaýipsizdigi qyzmetinde júrgen qyz-kelinshekterdi polıtseılik mamandyqqa taǵdyrlary toǵystyryp ákelgen. Qıyndyǵy men qyzyǵy birge qatar órilgen bul qyzmetti polıtseı-arýlar árdaıym maqtanysh etedi.
Alııa Kýsaınova, Kóliktegi polıtsııa departamenti Tergeý basqarmasynyń aǵa tergeýshisi, polıtsııa maıory
«Іshki ister organynda qyzmet jasap júrgenime 14 jyldan asty. Meniń negizgi qyzmetim tergeý jumystary. Aǵa anyqtaýshymyn. Osy jyldar ishinde túrli qylmystarmen jumys jasap, birneshe kúdiktilermen betpe-bet keldim. Maǵan bul qyzmet batyl bolýdy úıretti. Degenmen de áıel zatynyń mindetin de umytqan emespin. Úıde úsh bala tárbıelep otyrǵan ana, aıaýly jarmyn dep maqtanyshpen aıta alamyn», - dedi ol.
Aıgúl Zakırova, Kóliktegi PD Kadr saıasaty basqarmasynyń Psıhologııalyq daıarlyq tobynyń psıhology, polıtsııa podpolkovnıgi
«Qyzmettegi jáne úıdegi basty mindetterim men úshin úlken jaýapkershilik. Iyǵymdaǵy polıtsııa podpolkovnıgi sheni meniń qyzmettegi mańdaı ter, adal eńbegimmen jetken jeńisim. Bul men úshin úlken abyroı.
«Psıholog – azamattar túrli qıyndyqtarǵa ushyraǵanda, shyrǵalań oqıǵalarǵa tap kelgen jaǵdaılarda qoldaý kórsetetin maman. Mundaı maman qyzmettiń qaı salasyna bolmasyn qajet dep oılaımyn. Búgingi kúni polıtseıler psıhologııasynyń daıyndyǵy olardyń qyzmetinde zor mańyzǵa ıe. Osy oraıda biz jeke qurammen túrli jaǵdaıattardan shyǵý maqsatynda kóptegen sharalar júrgizemiz. Qyzmetim – adamdarǵa qýanysh syılaıdy dep aıta alamyn. Árıne, túrli qıyndyqtardyń oryn alýy - zańdylyq. Degenmen de, quqyq qorǵaý salasynyń talaby joǵary bolǵandyqtan, biz kún tún demeı eńbek etemiz. Bul rette otbasymyzdy da umytpaýymyz qajet», - dedi Aıgúl Zakırova.
Aıgúl Jaqsylyqova, Kóliktegi PD Ákimshilik polıtsııa basqarmasynyń Qoǵamdyq tártipti saqtaýdy uıymdastyrý tobynyń aǵa ınspektory, polıtsııa maıory
«Polıtseı bolý – bala kúngi armanym. Kólik polıtsııasynda 12 jyldan beri qyzmet atqaryp kelemin. Qoǵamdyq tártipti saqtaý men azamattardyń qaýipsizdigin qamtamasyz etýde meniń qyzmetim zor mańyzǵa ıe. Osy jyldar ishinde úlken tájirıbe jınadym, kóp nárse ózime sabaq boldy. Qaısarlyqqa, tózimdilikke úırendim. Bul qyzmet men úshin, otbasym úshin de úlken maqtanysh. Osy salada júrip ómirlik jarymdy jolyqtyrdym. Joldasym Jandos ta kólik polıtsııasynda eńbek etedi. Qazir eki qyz tárbıelep otyrǵan baqytty otbasymyz. «Áıel bir qolymen álemdi terbetse, bir qolymen besik terbetedi» degen sóz beker aıtylmasa kerek. Qyz – bolashaq ana, shańyraqtyń uıytqysy, sánin keltiretin berekesi. Sondyqtan ana retinde ýaqyttyń tyǵyzdyǵyna qaramastan, qyzdarymnyń tárbıesine de erekshe kóńil bólemin», - dedi Aıgúl Jaqsylyqova.
