QR ІІM Kóliktegi ІІD Naýryz merekesin atap ótti
ASTANA. 18 naýryz. QazAqparat /Jasulan Amanbaıuly/ - Búgin Astanada QR ІІM Kóliktegi ishki ister departamentiniń ujymy kele jatqan Áz-Naýryzdy dýmanmen qarsy aldy.
Kóliktegi ІІD-niń qyzmetkerleri kún men tún teńesetin, izgilik pen jaqsylyq saltanat quratyn Naýryz meıramyn jyl saıyn atap ótýdi dástúrge aınaldyrǵan.
Bıyl da osy úrdisinen jańylmaǵan ujym dastarǵan jaıyp, basqarma, derbes bólim qyzmetkerleri arasynda eldiń salt-dástúrin kórsetip, umyt bolyp bara jatqandaryn jandandyrýǵa baǵyttalǵan baıqaýlar ótkizdi.
Top-topqa bólingen qyzmetkerler negizinen qazaqtardyń besikke salý, tusaý kesý, kelin túsirý, betashar, qyrqynan shyǵarý degen dástúrleri men yrym-joralaryn kórsetý, qazaqtyń turmysyna baılanysty kıiz úı ishin eń úzdik bezendirý boıynsha qarym-qabyletterimen synasty.
«Basty maqsatymyz - at ábzelderi, kóne zamandaǵy qarý-jaraqtar, keshegi turmysta qoldanylǵan zattar, qaıys óńdeý, teri talqylaý, túskıiz basý syndy ómir saltyna qajetti buıymdardyń qasıetin kelesi urpaqqa jetkizý, elimizdiń eldigin, jerimizdiń eńsesin, birligin saqtaý dep oılaımyn»,-dep atap kórsetti Kóliktegi ishki ister departamenti Zańsyz kóshi-qonǵa qarsy kúres basqarmasynyń bastyǵy, polıtsııa podpolkovnıgi Nurlan Sadyqov.
