QR ІІM Kóliktegi ІІD Áz - Naýryzdy qarsy aldy
ASTANA. 20 naýryz. QazAqparat - Búgin QR ІІM Kóliktegi ІІD Naýryz merekesin atap ótti. Bul týraly vedomstvonyń baspasóz qyzmeti habarlaıdy.
Kóliktegi ІІD májilis zalynda «Qosh keldiń, Áz - Naýryz» atty ádebı-sazdy, teartlandyrylǵan merekelik is-shara bolyp ótti.
Mereke barysynda Kóliktegi ІІD qyzmetkerleri ultymyzdyń salt-dástúrlerinen kórinis kórsetý boıynsha top-topqa bólinip, ózara saıysqa tústi. Onyń ishinde, «Besikke bóleý», «Balany qyrqynan shyǵarý», «Tusaý kesý», «Betashar», «Bata berý» syndy qazaq halqynyń tamasha salt-dástúrlerin naqyshyna keltire nasıhattaı bilgen ujym jeńimpaz atandy.
Sondaı-aq, merekelik shara sheńberinde án men kúıden shashý shashylyp, ulttyq-sporttyq oıyndar ótkizildi. Kólik polıtseıleriniń uıymdastyrýymen mekeme ǵımaraty merekege saı bezendirilip, ulttyq taǵamdarǵa toly qazaq dastarhanynan kelgen qonaqtarǵa dám tatqyzylyp, naýryz kóje taratyldy.
Berekeli de merekeli osynaý sharaǵa Kóliktegi ІІD ardagerleri qatysty.
