QR ІІM: Qazaqstanda sottalǵandar azaıǵanmen, qylmys sany kemimeı tur
NUR-SULTAN. QazAqparat - Búgin Nur-Sultanda Іshki ister mınıstri Erlan Turǵymbaevtyń qatysýymen «Ashyq dıalog - penıtentsıarlyq júıeni reformalaý quraly» atty forým ótip jatyr, dep habarlaıdy QazAqparat tilshisi.
Shara Ortalyq Azııadaǵy halyqaralyq túrme reformasy (PRI) ókildiginiń qoldaýymen uıymdastyrylyp otyr. Oǵan Parlament depýtattary, Qazaqstan Respýblıkasyndaǵy Bala quqyqtary jónindegi ýákil, memlekettik organdardyń, úkimettik emes jáne halyqaralyq uıymdardyń ókilderi, qoǵamdyq baqylaý komıssııalarynyń, ulttyq aldyn alý tetiginiń músheleri shaqyrylǵan.
Qylmystyq atqarý júıesi komıteti tóraǵasynyń orynbasary Meıram Aıýbaevtyń aıtýynsha, elimizde 25 myń adam túzetý mekemelerinde otyrsa, 35 myń adam qylmystyq atqarý esebinde tur.
«Respýblıka aýmaǵynda qylmys sany bir deńgeıde. Al bas bostandyǵynan aıyrylǵandar sany jyl saıyn azaıýda. Óıtkeni, eldegi zańnama qylmystyq atqarýdyń balama joldaryn qoldanýǵa múmkindik berip otyr» - deıdi Meıram Aıýbaev.
Ashyq dıalog formatynda alǵash ret ótip jatqan forýmda adam quqyqtary men bostandyqtarynyń saqtalýy, sottalǵandardy ustaý sharttary, qylmystyq atqarý júıesin halyqaralyq standarttarǵa jaqyndatý máseleleri qaralady.
