QR ІІM Qaraǵandydaǵy tóbeles týraly aqparattyń kidirý sebebin túsindirdi
ASTANA. QazAqparat - QR Іshki ister mınıstriniń birinshi orynbasary Janat Súleımenov «Ejelgi Rım» meıramhanasyndaǵy tóbeles týraly aqparattyń keshiktirilýi sebebin aıtyp berdi, dep habarlaıdy QazAqparat.
«Bul turǵyda birinshi kezekte materıaldardy zertteý, kýágerlerden jaýap alý, kózbe-kóz bettestirý, túrli saraptamalardy taǵaıyndaýdy eskerý kerek. Osy sharalardyń barlyǵy belgili ýaqytty talap etedi», - dedi Janat Súleımenov Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, qazirgi kezde atalǵan oqıǵa boıynsha mán-jaı anyqtala bastady.
«Eki jaqtyń da (tóbeleske qatysqan) adamdary anyqtaldy. Kúdiktiler qamaýǵa alynyp, tergeý amaldary jalǵasýda», - dedi J. Súleımenov.
Budan buryn habarlanǵandaı, QR ІІM Іshki jáne syrtqy kommýnıkatsııalar departamentiniń dırektory Almas Sadýbaev Qaraǵandydaǵy tóbelestiń sebebin aıtty. Aıta keteıik, Qaraǵandydaǵy kisi ólimine qatysty 8 kúdikti tutqyndaldy.
