QR ІІM Іshki áskerler Bas qolbasshysynyń kýbogi úshin qoıan-qoltyq urystan tuńǵysh halyqaralyq týrnır aıaqtaldy
Tatamı tórinde ózara myqtyny anyqtaý úshin Reseı, Ázerbaıjan, Qyrǵyzstan jáne elimizdiń kúsh qurylymdarynan jınaqtalǵan 200-den asa sportshy segiz salmaq dárejesinde baq talastyrdy, dep habarlady atalǵan vedomstvonyń baspasóz qyzmetinen.
Elordanyń 15 jyldyǵyna oraı uıymdastyrylǵan halyqaralyq saıysqa Qazaqstan Respýblıkasynyń sport jáne dene shynyqtyrý isteri boıynsha agentigi, Іshki áskerler Bas qolbasshylyǵy men qoıan-qoltyq urys federatsııasy muryndyq boldy.
Mártebeli meımandardyń qatysýymen ótken jarystyń saltanatty ashylýynda sóz sóılegen Qazaqstan Respýblıkasynyń Іshki ister mınıstri polıtsııa general-leıtenanty Qalmuhanbet Qasymov sportshylarǵa tartymdy jekpe-jekter tilep, jeńiske shyn myqtynyń jetýine iltıpat tanytty.
Úsh kún boıy sharshy alańnyń shańyn qaqqan qoıan-qoltyq urysynyń sheberleri jigerlerin janyp, jeńiske jetýge qamshy basty. Bul turǵyda, ásirese, alań ıeleri - Іshki áskerler sportshylarynyń tegeýrini ózgelerinen myqtyraq kórindi. Reseıdiń Novosibir oblysynan kelgen «Vıtıaz» kúreń beretter baýyrlastyǵynyń jekpe-jek sheberleri jeńiske degen jigerligimen tanylyp, kórermenderdiń kózaıymyna aınala bildi.
Nátıjesinde segiz salmaq dárejesiniń teń jartysynda Іshki áskerler jaýyngerlerine teń keler qarsylas tabylmady. 60, 65, 70 jáne 75 keli salmaqta sáıkesinshe Atameken Baılollaev, Dáýren Qadyrbekov, Talǵat Saparǵalıev jáne Sultan Zeınelovtar jeńiske jetti.
80 kelide Qylmystyq-atqarý júıesi komıtetiniń sportshysy Rýstam Atabaev top jarsa, 85 kelide Іshki ister mınıstrliginiń qyzmetkeri Raıhan Madınov qarsylas shydatpady. 90 kelide UQK Shekara qyzmetiniń namysyn qorǵaǵan Nurbol Túreshbaev birinshi oryn aldy. Al eń aýyr - 90 keliden joǵary salmaqta ІІM taǵy bir sportshysy Pavel Lysenko jeńis tuǵyrynyń birinshi satysyna kóterildi.
Jalpykomandalyq synda Respýblıkalyq Ulan quramasy úshinshi nátıje kórsetse, Qylmystyq-atqarý júıesi komıtetiniń komandasy ekinshi boldy. Al jarys jeńimpazymen birge Іshki áskerler Bas qolbasshysynyń kýbogin Іshki áskerler quramasy enshilerine jazdy.
Jeńimpazdar jáne jeke birinshiliktegi júldegerler medaldar, dıplomdar jáne baǵaly syılyqtarmen marapattaldy.