QR ІІM ınternette braýzerdi buǵattaıtyn alaıaqtardan abaı bolýǵa shaqyrdy
ASTANA. QazAqparat - Internet jelisi arqyly paıdalanýshynyń braýzeriniń jumysyn shekteıtin alaıaqtar paıda boldy.
«Internet jelisi arqyly taralatyn alaıaqtyqtyń keń taralǵan túri - ol paıdalanýshyny braýzerdiń jumysyn buǵattap tastaıtyn ınternet-resýrstarǵa (Internet Explorer, Google Chrome, Mozilla Firefox, Opera jáne t.b.) baǵyttaý. Alaıaqtar baǵyttaǵan ınternet-resýrsqa ótken kezde braýzer buǵattalady. Osydan keıin paıdalanýshynyń pornografııalyq kontentti kóshirip, saqtaýyna baılanysty zańdy buzǵandyǵyn habarlaıtyn Qazaqstan Respýblıkasy quqyq qorǵaý organdarynyń atynan mátin paıda bolady.
Buǵatty alyp tastaý úshin vırýs tólem termınaly arqyly 10-15 myń teńge kóleminde aıyppul tóleýdi talap etedi. Ony tólemegen jaǵdaıda is materıaly prokýratýraǵa joldanyp, pornografııalyq mazmundy kóshirip, saqtaǵany úshin qylmystyq jaýapkershilikke tartylatyny jóninde jazylady. Esińizde bolsyn, memlekettik organ azamattardyń kompıýterlerin (nemese smartfondaryn) buǵattamaıdy. Taratylǵan habarlamaǵa ІІM-niń qatysy joq»,-dep atap ótilgen QR ІІM baspasóz qyzmeti
QR ІІM mamandarynyń atap ótýinshe, bul jaǵdaıda tólem jasamaý kerek, eger tólem jasalsa, termınaldyń túbirtegin saqtap qoıyp, polıtsııaǵa shaǵymdaný qajet jáne túbirtekti aryzǵa qosa usynylady.
«Bopsalaýdyń osyndaı faktilerine tap bolsańyz az ýaqyt ishinde ishki ister organdaryna shaǵymdanyńyz. Internet-alaıaqtary sengish adamdardy quryǵyna túsirýge tyrysady. Internet-alaıaqtyqtyń qurbany bolmas úshin neni bilý qajet: kompıýterde (nemese smartfonda) kúmán týdyratyn baǵdarlamalardy qospańyz nemese kúmán týdyratyn mazmundaǵy resýrstarǵa kirmeńiz (onyń ishinde jarnamalyq bannerler jáne kóshpeli terezesheler)»,- delingen aqparatta.
