QR ІІM: Esirtki saýdasyna qatysty stýdentterden quralǵan top ustaldy
ASTANA. QazAqparat - Internet resýrstar arqyly estirtki saýdalaǵan qylmystyq top áshkerelendi. Bul týraly búgin Astanada ótken baspasóz máslıhatynda QR ІІM Esirtki bıznesine qarsy kúres departamentiniń basshysy Sultan Qusetov málim etti.
«Sońǵy kezde esirtki bıznesin uıymdastyrýshylar elimizdiń aýmaǵynda ınternet resýrstardyń kómegimen esirtki ótkizýdi qolǵa alǵan. Taıaýda Almaty qalasynyń Іshki ister departamenti uzaq júrgizilgen jedel sharalardyń nátıjesinde 20-25 jas aralyǵyndaǵy 8 adamnan quralǵan qylmystyq topty ustady. Olardyń tórteýi Shveıtsarııa, Reseı jáne Qazaqstannyń belgili joǵarǵy oqý oryndarynyń stýdentteri»,-dep atap ótti S. Qusetov.
Qylmystyq kestede «Qiwi-Koshelek» elektrondyq júıesine aqsha aýdarý eskerilgen. Osy toptyń jetekshisi ózine senimdi degen ortadaǵy adamdarmen baılanys ornatqan. Ol esirtkige tapsyrys beretinderge uıaly telefondardyń nómirlerin joldap otyrǵan. Klıentter tapsyrys bergen soń, «Qiwi-Koshelek» elektrondy júıesi arqyly tapsyrys úshin aqsha tóleıdi. Osydan keıin olarǵa uıaly telefon arqyly esirtkini qaı jerden alý kerektigi týraly habarlanyp kelgen.
Atap aıtqanda, jedel-izdestirý sharalaryn júrgizý barysynda esirtki bıznesine qarsy kúres bólinisteriniń qyzmetkerleri olardyń jaldamaly páterinen zańsyz zerthanany jáne úı jaǵdaıynda qarasorany qoldan ósirýge arnalǵan jyly-jaı lampalary, jeldetkishter men elektrondy qurylǵylardy anyqtady.
«Tintý júrgizý kezinde 20 keliden astam esirtki, onyń ishinde 18 keli gashısh, sondaı-aq eki keli marıhýana tárkilendi. 18 keli gashısh 3600-ǵa jýyq dozany quraıdy, ıaǵnı onyń quny 21 mln. teńgege baǵalanady», - dedi departament basshysy.
Qazirgi ýaqytta atalǵan toptyń esirtki ótkizdi degen 10 faktige qatystyǵy dáleldendi. Ustalǵandar Almaly aýdandyq sotymen qamaýǵa alyndy.
