QR ІІM Esirtki bıznesine qarsy kúres komıteti 3 dárigerdi qylmystyq jaýapkershilikke tartýda
ASTANA. 27 aqpan. QazAqparat - Esirtkilerdi daıyndaýǵa qoldanylatyn quramynda kodeıni bar dárilik quraldardy satý tártibi buzylǵan 18 fakti anyqtaldy.
Bul týraly búgin QR ІІM Esirtki bıznesine qarsy kúres komıteti tóraǵasynyń orynbasary Janat Bıtenov málim etti.
Atap aıtqanda, ІІM Esirtki bıznesine qarsy kúres komıteti aǵymdaǵy jylǵy 18-22 aqpan aralyǵynda respýblıka aýmaǵynda «Dopıng» jedel-aldyn alý is-sharasynyń birinshi kezeńin ótkizdi. Operatsııanyń negizgi maqsaty esirtki kontrabandasyn, baqylaýdaǵy esirtki quraldaryn, psıhotroptyq zattar men prekýrsorlardy zańsyz aınalymǵa jylystatý faktilerin anyqtaý bolyp tabylady.
Onyń aıtýynsha, operatsııa barysynda esirtkiniń aınalymy salasyndaǵy qyzmetti júzege asyratyn 554 jeke kásipkerlik sýbektisin, onyń ishinde 234 dárihana, 65 qoıma, 143 emdeý-profılaktıkalyq mekemesi jáne 112 kásiporyn tekserildi. Esirtki zattaryn, psıhotroptyq nemese ýly zattardy saqtaý, esepke alý jáne satý erejelerin buzǵany úshin, lıtsenzııasy nemese sertıfıkaty joq bolǵanyna qaramastan, medıtsınalyq qyzmetpen aınalysqany úshin 14 qylmystyq is qozǵaldy.
Zańsyz aınalymnan 28 tonnadan astam prekýrsor jáne dárilik esirtki zattarynyń 22572 ampýlasy jáne 80 tabletkasy, psıhotroptyq zattardyń 9079 ampýlasy men 96447 tabletkasy tárkilendi. Operatsııa barysynda dárihanalarda dezomorfın tárizdi sıntetıkalyq esirtkilerdi daıyndaýǵa qoldanylatyn quramynda kodeıni bar dárilik quraldardy satý tártibi buzylǵan 18 fakti anyqtaldy. Atalǵan erejelerdi saqtamaǵany úshin 3 dáriger qylmystyq jaýapkershilikke, 171 adam ákimshilik jaýapkershilikke (onyń ishinde 41 medıtsına qyzmetkeri) tartylady.
