QR ІІM emtıhan-tirkeý bólinisteriniń taratylý sebebin túsindirdi
NUR-SULTAN. QazAqparat - Búgin Ortalyq kommýnıkatsııalar qyzmetindegi baspasóz máslıhatynda QR Іshki ister mınıstriniń keńesshisi - resmı ókil Nurdildá Oraz vedomstvoǵa qarasty emtıhan-tirkeý bólinisteriniń ne úshin taratylǵanyn túsindirdi, dep habarlaıdy QazAqparat tilshisi.
«Jaqyn arada Іshki ister mınıstrliginde múddeli memlekettik organdar ókilderiniń qatysýymen úlken jıyn ótti. Sol jıynda Іshki ister mınıstri Erlan Turǵymbaevtyń bastamasymen vedomstvoǵa qarasty emtıhan-tirkeý bólinisteriniń qyzmetterin Halyqqa qyzmet kórsetý ortalyqtaryna berý týraly sheshim qabyldandy. Qazirgi ýaqytta Mamandandyrylǵan halyqqa qyzmet kórsetý ortalyqtarynda kólikti tirkeý, júrgizýshi kýáligin berý, sonymen qatar memlekettik nómirlerdi tirkeý boıynsha aryzdar qabyldanyp, jumys júrgizilip jatyr. Biraq, polıtsııa óz kezeginde tájirıbelik jáne teorııalyq emtıhandardy qadaǵalap, qorytyndy berip otyratyn. Biz bul qyzmetti de «Azamattarǵa arnalǵan úkimet» memlekettik korporatsııasyna berýdi jón dep sheshtik», - dedi ol.
Onyń atap ótýinshe, mundaı sharalar qarapaıym halyqqa memlekettik qyzmetterdi alý barysynda qolaıly jaǵdaı jasaý úshin qolǵa alynǵan. Sonymen qatar ol emtıhan-tirkeý bólinisterin taratýdyń zalal tustary bolmaıtyndyǵyn aıtty.
«Kerisinshe, bul, eń aldymen qarapaıym halyqtyń memlekettik qyzmetterdi jedel alýyna septigin tıgizedi. Ekinshiden, ishki ister organdaryndaǵy jemqorlyq syndy jaǵymsyz áreketterdi joıady»,- dedi N.Oraz.
