QR ІІM-de sıntetıkalyq esirtkilermen kúres máselesi talqylandy
ASTANA. QazAqparat - 19 qazanda Іshki ister mınıstri Qalmuhanbet Qasymovtyń tóraǵalyǵymen Esirtki bıznesine jáne nashaqorlyqqa qarsy is-qımyl jasaýǵa baǵyttalǵan memlekettik organdardyń qyzmetin úılestirý jónindegi vedomstvoaralyq shtabtyń otyrysy ótti. Bul týraly QR Іshki ister mınıstrliginiń baspasóz qyzmeti habarlady.
Іs-sharaǵa Vedomstvoaralyq shtabtyń músheleri: Ulttyq qaýipsizdik komıtetiniń, Qorǵanys, Aqparat jáne kommýnıkatsııalar, Densaýlyq saqtaý, Mádenıet jáne sport, Syrtqy ister mınıstrlikteriniń, Qarjy mınıstrliginiń Memlekettik kirister jáne qarjy monıtorıngi komıtetteriniń basshylary, sondaı-aq Ulttyq bank, Ádilet mınıstrliginiń Sot saraptamasy ortalyǵynyń jáne «QIWI Kazakhstan» JShS-nyń ókilderi qatysty.
Shtab otyrysy barysynda sıntetıkalyq esirtkilerdi taratýǵa qarsy kúres máseleleri, sondaı-aq ınektsııalyq esirtkilerdi tutynatyn nashqorlardy emdeýde apıyndy almastyrýshy terapııany budan ári qoldaný perspektıvalary qaraldy.
Negizgi ekpin jańa júıkege áser etetin zattardy taratýdyń, osy maqsatta Internet- resýrstardy, messendjerlerdi jáne elektrondy tólem júıelerin paıdalanýdyń jolyn kesýge jasaldy.
Sonymen qatar esirtkilik zattardy zańsyz taratý salasyndaǵy qylmystardy sotqa deıingi tergeý sheńberinde alynatyn zattardyń sot-hımııalyq saraptamalaryn júrgizý máseleleri talqylandy.
Osyǵan deıin Elbasy tapsyrmasy boıynsha ІІM polıtsııany jańǵyrtý jónindegi jol kartasyn ázirleýge kiriskendigi jazyldy.
