QR ІІM-de Almaty áýejaıyndaǵy qaýipsizdik máselesi talqylandy
ALMATY. QazAqparat – QR Іshki ister mınıstrliginde «Almaty halyqaralyq áýejaıy» AQ basshylyǵynyń bastamasy boıynsha mınıstr Erlan Turǵymbaev aktsıonerlik qoǵam Prezıdenti Alp Er Týgna Ersoımen kezdesti, dep habarlaıdy QazAqparat.
Kezdesý barysynda A. Ersoı mınıstrge kompanııanyń Almaty qalasy áýejaıynyń bazasynda Ortalyq Azııanyń óńirlik kóliktik-tranzıttik torabyn qurý jáne halyqaralyq standarttarǵa sáıkes keletin jańa jolaýshylar termınalynyń qurylysyna qatysty jospary týraly aıtyp berdi.
Sonymen qatar, ol qaýipsizdikti qamtamasyz etý máselelerinde ishki ister organdarymen ózara is-qımyl basym bolyp tabylatynyn atap ótti.
Sondaı-aq, taraptar áýejaıdyń irgeles aýmaǵyndaǵy beınebaqylaý tıimdiligi máselelerin talqylady.
Óz kezeginde, E.Turǵymbaev ІІM Almaty halyqaralyq áýejaıy basshylyǵynyń jolaýshylar men áýe ushýlarynyń qaýipsizdigin qamtamasyz etý úshin osy strategııalyq nysanda quqyqtyq tártiptiń tıimdi júıesin qurý boıynsha birlesken jumysqa daıyndyǵyn quptaıtynyn bildirdi.
