QR ІІM búıregi joq balalar máıiti týraly WhatsApp-habarlamaǵa pikir bildirdi
ASTANA. QazAqparat - Jol boıynan tabylǵan balalardyń máıiti týraly WhatsApp jelisindegi habarlamanyń Qazaqstanǵa esh qatysy joq. Bul týraly QR Іshki ister mınıstrliginiń resmı ókili Almas Sadýbaev málimdedi, dep habarlaıdy QazAqparat.
«Qaıyrly kún! Jol boıynan 6-8 jastaǵy eki qyzdyń máıiti tabyldy. Árqaısysynyń qolynda 50 000 rýbl boldy, biraq búırekteri joq. Óz balalaryńyzǵa muqııat qarańyz jáne baqylaýsyz kóshege jibermeńiz», - delingen habarlama mátininde.
Іshki ister mınıstrligi qazaqstandyqtarǵa kúdikti aqparatty taratpaýǵa keńes berdi.
«Áleýmettik jelide taraǵan máıit sýretteriniń bizdiń elimizge esh qatysy joq. Oqıǵa Reseıdiń ońtústigindegi Kaspıısk qalasynda bolǵan. Kezekti ret turǵyndarǵa kúdikti aqparatty taratpaýǵa keńes beremin. Zańnamada jalǵan aqparatty taratqandarǵa qylmystyq jaýapkershilik qarastyrylǵan», - dep málimdedi Almas Sadýbaev.
