QR ІІM bas bostandyǵy shekteýli tulǵalardy qadaǵalaýǵa arnalǵan elektrondy bilezik qunyn áli naqtylaǵan joq
ASTANA. QazAqparat - QR Іshki ister mınıstrligi bas bostandyǵy shekteýli tulǵalardy qadaǵalaýǵa arnalǵan elektrondy bilezik qunyn áli naqtylaǵan joq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR ІІM Qylmystyq atqarý júıesi komıteti tóraǵasynyń orynbasary Janat Keshýbaev málim etti.
«Elektrondy bilezikterge qatysty aıtar bolsam, qazirgi ýaqytta Іshki ister mınıstrliginde jumys toby qurylyp, ınvestıtsııalyq usynys ázirleýde. Atalǵan usynys mınıstrlikte, qyzmetter arasynda kelisimnen ótýde. Al onyń quny týraly ázirshe aıta almaımyz», - dedi J.Keshýbaev.
Onyń atap ótýinshe, elektrondy bilezik jasaý - keshendi jumys. Onyń quny ınvestıtsııalyq usynys tolyq ázirlengennen keıin ǵana belgili bolady. Qazirgi ýaqytta mınıstrlik usnystaryn ekonomıkalyq saraptama jasaý úshin elimizdiń Ulttyq ekonomıka mınıstrligine bergen.
«Onyń ekonomıkalyq tıimdiligine qatysty aıtar bolsam, bul - álemdik tájirıbe. Sottalýshylardy qorshaý ishinde kúzetip, olarǵa qyzmet kórsetý, baqylaýdan góri olardy úıinde monıtorıng arqyly qadaǵalaǵan tıimdi. Bir adam máselen, búkil oblysqa qyzmet kórsetip, barlyq qozǵalysty baqylap otyra alady», - dedi komıtet tóraǵasynyń orynbasary.
Aıta keteıik, Qazaqstanda bas bostandyǵy shekteýli túrde jazasyn óteýshi tulǵalardy, sondaı-aq qylmystyq-atqarý júıesi ınspektsııasynyń tirkeýinde turǵandardy qadaǵalaýdy júzege asyrý kezinde paıdalanylatyn «elektrondy bilezikter» dep atalatyn izge túsýdiń elektrondy quralyn engizý josparlanyp otyr. Bul atalǵan sanattaǵy tulǵalarǵa baqylaýdy kúsheıtýge, ýaqytyly olardyń turǵan jerin anyqtaýǵa, jazasyn óteýdiń bekitilgen tártibinen jaltarýdy toqtatýǵa, sondaı-aq eskertýge múmkindik beredi.
