QR ІІM Almatydaǵy adamdy bólshektep ketken jol apatyn tekserýdi qaıta qolǵa aldy
ALMATY. QazAqparat - QR ІІM Almatydaǵy adamdy bólshektep tastaǵan jol apatyn tekserýdi qaıta qolǵa aldy, dep habarlaıdy QazAqparat tilshisi.
Bul týraly QR Іshki ister mınıstri Qalmuhambet Qasymov dialog.egov.kz elektrondy úkimet saıtyndaǵy blogynda jaýap berdi.
Mınıstr atalǵan jol apaty boıynsha qylmystyq isti toqtatý týraly sheshim buzylǵanyn habarlady.
Adam ólimine ákelgen jol apaty boıynsha qylmystyq isti Almaty qalalyq ІІD anyqtaý basqarmasy qaıta qaraýǵa alyp, tergeý jumystaryn bastap ketti.
Munyń aldynda mınıstr atalǵan derek boıynsha qylmystyq is toqtatylǵanyn habarlaǵan bolatyn.
Aıta ketý kerek, jol apaty 30 shilde kúni túngi 2 shamasynda bolǵan.
19 jastaǵy jigit tizgindegen Mersedes kóligi ál-Farabı dańǵylymen shyǵysqa qaraı kele jatyp, Seıfýllın kóshesine jetpeı jaıaý júrginshini qaǵyp ketedi. Sonyń saldarynan 48 jastaǵy er adam oqıǵa ornynda kóz jumdy. Aldyńǵy áınektiń synyqtaryna marqumnyń denesi ekige bólinip, keýde tusy kóliktiń ishinde qalyp qoıǵan. Al qol-aıaǵy jol ústinde shashylyp qaldy.
Atalǵan derek QR QK 345-babynyń 3-bólimimen, 347-babymen sotqa deıingi biryńǵaı tergeý isi tizilimine tirkeldi.
