QR ІІM Almaty oblysynda balalardyń jynystyq zorlyqqa ushyraýyna qatysty málimdeme jasady
ASTANA. QazAqparat - QR Іshki ister mınıstrligi demalys kúnderi Almaty oblysynda 5 bala jynystyq zorlyq-zombylyqqa ushyrady degen aqparatqa oraı málimdeme jasady, dep habarlaıdy QazAqparat tilshisi.
QR ІІM Memlekettik til jáne aqparat departamentiniń dırektory Almas Sadýbaevtyń aıtýynsha, tamyz aıynda Qarasaı aýdandyq ishki ister basqarmasyna kámeletke tolmaǵan balalarǵa zorlyq jasaýǵa qatysty úsh shaǵym túsken. Olardyń barlyǵy da sotqa deıin tergeýdiń biryńǵaı tizilimine tirkelgen.
«Qazirgi ýaqytta oryn alǵan jaıttyń barlyq mán-jaıyn anyqtaýǵa baǵyttalǵan qajetti tergeý sharalary júrgizilip jatyr. Barlyq kúdikti anyqtaldy. Olardyń barlyǵy da kámelettik jasqa tolmaǵan. Osy jaıtty eskere otyryp, Іshki ister mınıstrligi qoldanystaǵy zańnamaǵa sáıkes kámelettik jasqa tolmaǵandardyń qupııa qalý quqyǵyn saqtaý qajettigin eskertedi. Kámelettik jasqa tolmaǵandardyń quqyqtary men zańdy múddelerin buzýǵa alyp keletin málimetterdi jarııa etý qylmystyq jaýapkershilikke ákep soqtyrady», - dedi Almas Sadýbaev.
