QR ІІM «Ábý-Dabı Plaza» janjalyna qatysty jańa derekter jarııa etti
ASTANA. QazAqparat - «Ábý-Dabı Plaza» aýmaǵyndaǵy janjalǵa baılanysty qylmystyq is qozǵaldy. Bul týraly QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
«2 qyrkúıek kúni salynyp jatqan «Ábý-Dabı Plaza» nysany aýmaǵynda oryn alǵan oqıǵaǵa baılanysty QR Іshki ister mınıstrligi qosymsha mynany habarlaıdy: Astana qalalyq Іshki ister departamenti QR Qylmystyq kodeksiniń 293-baby 2-tarmaǵy (buzaqylyq) boıynsha tirkelgen qylmystyq is aıasynda júrgizilgen jedel tergeý sharalarynyń nátıjesinde kúzet fırmasynyń qyzmetkeri Polatovqa dene jaraqatyn salýǵa qatysqan kúdiktiler anyqtaldy. Polatovtyń soqqyǵa jyǵylýyna qarymta jaýap retinde qurylys nysanynyń jumysshysy Úndistan azamatyn soqqyǵa jyǵýǵa qatysqan kúzet qurylymynyń qyzmetkerlerinen kúdiktiler de anyqtaldy», - dedi ol.
Onyń aıtýynsha, qazirgi ýaqytta atalǵan is boıynsha janjalǵa qatysýshylardyń is-áreketin naqtylaýǵa baǵyttalǵan qajetti tergeý amaldary júrgizilip jatyr. Onyń nátıjesine sáıkes sáıkesinshe qylmystyq zań boıynsha quqyqtyq baǵa berilip, kináliler jaýapkershilikke tartylatyn bolady.
«Buǵan qosa, Astana qalasynyń ishki ister organdary «Ábý-Dabı Plaza» aýmaǵyndaǵy janjaldyń jolyn kesý barysynda 3 qyrkúıek kúni túnde qoǵamdyq tártipti buzýǵa jol bergen azamattarǵa qatysty sharalar qabyldady. Polıtsııa bólimshesine jetkizilgen 41 adamnyń 8-i ákimshilik jaýapkershilikke tartyldy. Qalǵandary túsindirý jumystary júrgizilip, qoǵamdyq tártipti buzýǵa jol bermeý týraly eskertýden keıin bosatyldy. QR ІІM elorda turǵyndary men qonaqtaryn qoǵamdyq tártipti buzýǵa baǵyttalǵan zańǵa qaıshy is-áreketke barmaýǵa, sonymen qatar bolǵan oqıǵaǵa baılanysty jalǵan aqparattardy taratpaýdy eskertedi. Joǵaryda atalǵan jaıttar oryn alǵan jaǵdaıda kináliler zańmen belgilengen jaýapkershilikke tartylady», - dedi Almas Sadýbaev.
