QR ІІІ qysqy Spartakıadasynda ShQO quramasy jeńiske jetti
ASTANA. 11 aqpan. QazAqparat - 5-10 aqpan kúnderi Qaraǵandy qalasynyń Muz aıdyny saraıynda shaıbaly hokkeıden QR ІІІ qysqy Spartakıadasy ótti.
Astana qalasynyń resmı saıty Týrızm, dene tárbıesi jáne sport basqarmasynyń baspasóz qyzmetine silteme jasap habarlaýynsha, jarysqa elimizdiń aımaqtary men Astana jáne Almaty qalalarynan toǵyz komanda qatysty. «Astana», «Barys-2» jáne «Qar barysy» HK oıynshylary, sondaı-aq áýesqoı-ardagerler elordalyq hokkeı mektebi atynan shyǵyp, «sheptiń» bir jaǵynda boldy.
Eki topqa bóliný úshin aldymen komandalar ózara oıyn órnegin órbitti.
Astanalyqtar birinshi oıynda 5:4 esebimen Qostanaıdyń komandasyna ese jiberip, ekinshi jáne úshinshi oıyndarda jeńisti ustap qaldy. Pavlodar oblysy komandasymen bastapqy oıynda Astana komandasy 7:4 esebimen jeńiske jetip, elordalyq shabýylshy Denıs Tararın tórt ret kózge tústi. Almaty qalasy komandasymen oıyn 7:3 esebimen aıaqtaldy. Astana komandasynyń qorǵaýshysy Nıkıta Eremenko jaqsy oıyn kórsetti. Upaı sanyn arttyrǵan astanalyq hokkeıshiler toptar arasynda top jaryp, spartakıada fınalynda baq synaý quqyǵyna ıe boldy.
Oıyn fınaly 10 aqpan, jeksenbi kúni ótti. Negizgi oıynshylary «Torpedo-2» komandasynan turatyn ShQO komandasy esepti alǵashqy bolyp ashty. Ekinshi kezeńde astanalyqtar alǵa shyqqanymen, úshinshi kezeńde ShQO quramasynyń qarymtasyz salǵan tórt shaıbasy jeńisti aıqyndap berdi. Sonymen fınaldyq kezdesýde 5:2 esebimen ShQO komandasy birinshi orynǵa shyǵyp, al Astana quramasy Spartakıadanyń kúmis júldegeri atandy. Úshinshi oryndy Qaraǵandy oblysynyń komandasy ıelendi.
