QR IIDM komıtet basshysy aýyz sý baǵdarlamasyna qatysty synǵa pikir bildirdi
NUR-SULTAN. QazAqparat - Senat spıkeri Darıǵa Nazarbaeva jaqynda aýyz sý baǵdarlamasynyń júzege asyrylýyn synǵa alǵan bolatyn. Bul synǵa qatysty qandaı jumys atqarylatynyn QR Indýstrııa jáne ınfraqurylymdyq damý mınıstrligi Qurylys jáne turǵyn-úı kommýnaldyq sharýashylyǵy isteri komıtetiniń tóraǵasy Marhabat Jaıymbetov aıtyp berdi, dep habarlaıdy QazAqparat tilshisi.
Eske sala ketsek, osydan eki kún buryn senatorlardyń ortalyq atqarýshy jáne jergilikti ókiletti organdary basshylarymen kezdesýi barysynda Senat spıkeri Darıǵa Nazarbaeva aýyz sý baǵdarlamasynyń júzege asyrylýyn synǵa alǵan bolatyn.
«Óńirlerdi aýyz sý baǵdarlamasynyń etý úshin táýelsizdik alǵaly 540 mlrd teńgeden astam qarjy jumsaldy. Biraq, kóptegen eldi mekenderde halyq taza aýyz sýǵa qol jetkize almaı keledi. Osy aýyz sý baǵdarlamasy «Bermýd úshtaǵany» sııaqty, qarjy jumbaq jolmen joǵalyp ketedi. Nelikten?», - degen edi Darıǵa Nazarbaeva.
Marhabat Jaıymbetov bul jumystarǵa qatysty kemshilikter baryn jasyrǵan joq.
«Negizinen qomaqty qarajat bólindi, aýqymdy jumystar atqarylyp jatyr. Aldymen, «Aqbulaq» baǵdarlamasy, keıin «Aýyz sý» baǵdarlamasy qolǵa alynyp, endi aımaqtardy damytý baǵdarlamasy osy jumystardy jalǵastyrýda. 590 mlrd teńge bólindi, 940 aýyl ortalyqtandyrylǵan sý júıesine qosyldy. Bul aıtarlyqtaı kóp jumys ekenin aıta ketý kerek. Álbette, kemshilikter joq emes, aıaqtalmaı qalǵan nysandar bar. Biraq, ýaqyt óte kele bári sheshilýi tıis», - deıdi Marhabat Jaıymbetov.
Onyń aıtýynsha, 2019 jyldyń qorytyndysy boıynsha aýyldy jerlerde ortalyqtandyrylǵan sýmen jabdyqtaýǵa qoljetimdilikti aýyldar sany boıynsha 62 paıyzǵa deıin, al turǵyndar sany boıynsha 88 paıyzǵa deıin arttyrý josparlanyp otyr.
«Sondaı-aq, memlekettik baǵdarlamada bıýdjet qarajatyn utymdy paıdalanýdy qamtamasyz etý maqsatynda sýmen jabdyqtaý jáne sý tartý jobalaryn josparlaý, irikteý jáne iske asyrý boıynsha júıeli tásil kúsheıtildi: qujattarǵa qoıylatyn talaptar tolyqtyryldy, barlyq óńirde (Jambyl oblysynan basqa) 2025 jylǵa deıingi aýyldy jerlerge qatysty keshendi josparlar ázirlendi. Negizgi talaptar men basymdyqtar naqtylandy», - deıdi ol.
