QR IDM ushaqtardaǵy aqaýlardyń jıilep ketýine alańdaýly
ASTANA. QazAqparat - QR Investıtsııalar jáne damý mınıstrliginde vıtse-mınıstr R.Sklıardyń tóraǵalyǵymen elimizdegi jetekshi áýe tasymaldaýshylardyń qatysýymen ushýlardyń qaýipsizdigin qamtamasyz etý máseleleri boıynsha jedel keńes ótti, dep habarlaıdy mınıstrliktiń baspasóz qyzmeti.
Keńesti ótkizýdegi basty sebep - keıingi ýaqytta qazaqstandyq áýe kompanııalardyń ushaqtaryndaǵy aqaýlardyń jıilep ketýine baılanysty.
Keńeske «Air Astana», «Bek Air» jáne «Qazaq Air» kompanııalarynyń ókilderi shaqyryldy. Jıyn qorytyndysy boıynsha Azamattyq avıatsııa komıteti tóraǵasynyń orynbasary Talǵat Lastaev keleńsiz oqıǵalardyń qaıtalanýyna jol bermeý úshin mınıstrlik júrgizip jatqan jumystarǵa qatysty túsinik berdi.
«Ushaq qozǵaltqyshynyń toqtap qalýy jáne navıgatsııalyq qural-jabdyqtardaǵy aqaýdan týyndaǵan oqıǵanyń sebepterine qatysty jáne qazirgi ýaqytta áýe kompanııa qabyldaǵan sharalar týraly jan-jaqty esebi tyńdaldy. Osyǵan baılanysty qandaı jumystar qolǵa alynǵanyn aıtty. Atalǵan jumystardy kúsheıtý jáne keleshekte mundaı keleńsiz oqıǵalarǵa jol bermeý týraly tıisti tapsyrma berildi. Qazirgi ýaqytta tıisti buıryq shyqty. Kóliktegi oqıǵalardy tekserý jónindegi departament osy úsh oqıǵany muqııat tekserýde. Tekserýge qatysty málimetter daıyn bolǵan kezde habarlaımyz» - dep atap ótti Talǵat Lastaev.
Onyń aıtýynsha, oqıǵanyń sebepterin kompanııanyń ózi de, sondaı-aq, mınıstrliktiń kólik oqıǵalaryn tekserý jónindegi departamenti jan-jaqty tekserip jatyr. Barlyq jaǵdaılar tirkelgen. Sonymen qatar, barlyq kompanııalarda ushýlardyń qaýipsizdigin basqarý jónindegi júıe engizildi-dedi T.Lastaev. Tekserý nátıjeleri 10 kúnniń ishinde daıyn bolady jáne qoǵamǵa jarııa etiledi.
