QR IDM Úndistanda júrgen qazaqstandyq týrısterge kartochka arqyly eseptesýlerine keńes berdi
ASTANA. QazAqparat - QR Investıtsııalar jáne damý mınıstrligi Týrızm ındýstrııasy departamenti Úndistan terrıtorııasynda júrgen qazaqstandyq týrısterdiń saqtyq sharalaryn qoldanyp, sabyr saqtaýlaryn, jergilikti bıliktiń talabyn oryndap, kópshilik oryndarynan aýlaq bolýǵa shaqyrady.
«Úndistanda 1000 jáne 500 rýpıı nomınaldy kýpıýrlar aınalymnan alynyp tastalǵanyna baılanysty halyqtyń tolqýyn eskerip, QR Investıtsııalar jáne damý mınıstrligi Týrızm ındýstrııasy departamenti osy eldiń terrıtorııasynda júrgen qazaqstandyq týrısterdiń saqtyq sharalaryn qoldanyp, sabyr saqtaýlaryn, jergilikti bıliktiń talabyn oryndap, kópshilik oryndarynan aýlaq bolýǵa shaqyrady jáne múmkindiginshe kartochkalyq júıe arqyly eseptesýlerine keńes beredi.
QR IDM Týrızm ındýstrııasy departamenti Qazaqstan Respýblıkasynyń Syrtqy ister mınıstrligimen baılanysta bolady.
QR Investıtsııalar jáne damý mınıstrligi Týrızm ındýstrııasy departamenti týroperatorlardy Úndistanǵa sapar shegýshi týrısterge atalmysh eldegi jaǵdaı týraly aldyn ala eskertýge shaqyrady», - delingen habarlamada.
Aıta keteıik, Úndistanda kóleńkeli ekonomıkamen, jemqorlyqpen, jalǵan aqsha jasaýshylarmen jáne terrorshylardy qarjylandyrýmen kúres aıasynda 2016 jyldyń 8 qarashasynan bastap eldegi eń iri banknottar - 1000 jáne 500 rýpıı nomınaldy kýpıýrlar aınalymnan alynyp tastaldy. Eldegi bankter bir kúndik úzilisten keıin jumystaryn 9 qarashada eski banknotalardy jańa 2000 rýpııge aıyrbastaýdan bastady. 10 qarashadan bastap jańa 500 rýpıı banknoty berilýde. 500 jáne 1000 rýpıı kýpıýralardy 2016 jyldyń 30 jeltoqsanyna deıin eldegi bankterde nemese poshta bólimshelerinde aıyrbastaýǵa bolady. Sondaı-aq, qolma-qol aqshasyz esep aıyrysýǵa eshqandaı shekteý joq. Qazaqstandyq týrıster Úndistanda bank kartochkalaryn paıdalana alady.
