QR IDM tranzıttik avtotasymaldaýshylar úshin «Sátti sapar» aqparattyq júıesin iske qosty
ASTANA. QazAqparat - Qazaqstan Respýblıkasy Investıtsııalar jáne damý mınıstrliginiń Kólik komıteti «Sátti sapar» aqparattyq júıesin pılotty rejımde engizý jumysyn bastady.
Júıe eldiń tranzıtti-kóliktik áleýetin arttyrý boıynsha júrgizilip jatqan jumystar aıasynda engizilýde. Júıeniń maqsaty betpe-bet kezdesýlerdi boldyrmaý, júkterdi jetkizý merzimin qysqartý, tranzıttik tasymaldaýshylar úshin ákimshilik kedergilerdi joıý, tasymaldaýshylarǵa yńǵaıly jaǵdaı jasaý jáne jol boıynda tekseristerdi jıiletpeý.
Búgingi tańda jyl saıyn Qazaqstan Respýblıkasy arqyly shamamen 80 myń tranzıttik avtokóliktik quraldary júrip ótedi. Negizgi baǵyttar: Qytaı Halyq Respýblıkasy - Eýrazııalyq ekonomıkalyq odaqtyń memleketteri, Reseı, Túrkııa, Qyrǵyzstan, Ózbekstan jáne Eýropa elderinen kele jatqan tranzıtti júkter.
Qazaqstan Respýblıkasy arqyly tranzıttik júk tasymaldaýdy josparlap otyrǵan tasymaldaýshylar úshin júıege óz erkimen tirkelý usynylady.
Júıe tasymaldaýshy sattisapar.gov.kz veb-portaly arqyly ótkizý beketterin, baǵytyn, ruqsattama nómirin jáne avtokóliktik qural týraly málimetterdi kórsete otyryp, júrip ótetin jolyn aldyn ala tirkeıdi.
Sondaı-aq derekterdi tekseredi, biregeı nómir menshikteıdi, elektrondy túrde málimetterdi tirkeıdi. Tasymaldaýshy onyń derekteri engizilgen qujatty basyp shyǵara alady.
Tasymaldaýshyǵa kóliktik baqylaý organdarynyń qyzmetkerine atalǵan qujatty kórsetý jetkilikti jáne qajet bolǵan jaǵdaıda ruqsattamanyń tranzıttik blankin (halyqaralyq kelisimderdiń normasyna sáıkes) kórsetedi.
Kóliktik baqylaý organdarynyń qyzmetkerleri júıe arqyly qujatta kórsetilgen derekterdi tekseredi. Tasymaldaýshymen derekter júıege durys engizilgen jaǵdaıda avtókólik tekserissiz júrip ótedi jáne júrip ótkeni týraly elektrondy belgi qoıylady.
Bul rette tasymaldaýshy kóliktik baqylaý ótkizilgen kúni men ýaqytyn, jáne elektrondy belgini qoıǵan qyzmetkerdiń deregin sattisapar.gov.kz veb-portaly arqyly kóre alady.
Qazir «Sátti sapar» pılottyq rejimde engizildi jáne odan ári eksportty-ımportty tasymaldaýdy júzege asyratyn tasymaldaýshylardy tirkeý josparlanýda.
Aldaǵy ýaqytta tasymaldaýshylarǵa atalǵan júıede uıaly telefon arqyly elektrondy túrde qajetti ruqsattamany rásimdeý múmkindigi usynylatyn bolady.
