QR IDM rýmynııalyq fýtbolshylarǵa qatysty oqıǵany baqylaýyna aldy
ASTANA. QazAqparat - QR IDM týrızm boıynsha departamentiniń dırektory Marat Iǵalı jáne Qazaqstan fýtbol Federatsııasynyń ókili «Rixos President Astana» qonaq úıinde fýtboldan Rýmynııa ulttyq quramasy músheleriniń aqshalary men jeke zattarynyń urlanýyna baılanysty qonaq úı basshylyǵymen kezdesti. Bul týraly Iǵalı Feısbýktegi paraqshasynda jazdy.
«Rixos President Astana» bas menedjeri Tansel Terdjannyń málimdemesi boıynsha, bul aqparatty quqyq qorǵaý organdary rastamaıdy.
Rýmynııalyq komanda músheleri belgisiz sebeptermen polıtsııaǵa shaǵymdanýdan bas tartty. Qonaq úıdiń bastamasy boıynsha kúzet qyzmetkerleri Astana qalasynyń ІІD ókilderimen birlesip qonaq úıdegi beınebaqylaý kameralaryn qosymsha tekserdi, qonaq úı qyzmetkerleri jaýapqa alyndy, tıisti tergeý amaldary júrgizildi», - dep jazdy QR IDM týrızm boıynsha departamentiniń dırektory.
«QR Investıtsııalar jáne damý mınıstrliginiń týrızm ındýstrııasy departamenti jaǵdaıdy baqylaýǵa alyp, atalǵan másele boıynsha istiń qaralýyna qatysady», - dep habarlady ol.
Eske sala ketsek, 11 qazanda ÁCh-2018 irikteý týrynda Qazaqstan fýtbol quramasymen oınaý úshin Rýmynııa fýtbolshylary Astanaǵa kelgen. Astana qalalyq Іshki ister departamentiniń baspasóz qyzmeti qyzmetiniń aqparatyna súıensek, sol kúni saǵat 18.25-te sportshylar aıaldaǵan «Rıksos» qonaq úıiniń ákimshi qyzmetkeri Astana qalasynyń polıtsııa pýltine habarlasyp, qonaqtardyń jeke zattary joǵalǵanyn habarlaǵan.
Alaıda «Rixos President Astana» qonaq úıi urlyq týraly alyp-qashpa áńgimege qatysty málimetterdiń naqty emes ári Astana qalasynyń quqyq qorǵaý organdarymen resmı dáleldenbegendigin málimdedi. 
