QR IDM mindetin oryndamaǵan AEA qatysýshylarymen kelisimdi buzady
ASTANA. QazAqparat - QR Investıtsııalar jáne damý mınıstrligi AEA barlyq qatysýshylarymen bekitilgen kelisimsharttarǵa aýdıt júrgizip jatyr. Bul týraly mınıstr Jeńis Qasymbek Úkimettiń búgingi otyrysynda málim etti, dep habarlaıdy QazAqparat tilshisi.
QR Premer-Mınıstri Baqytjan Saǵyntaev arnaıy ekonomıkalyq aımaq qatysýshylarynyń qyzmetine saraptama júrgizýdi tapsyrdy. «Tirkelgenderdiń sany óte kóp jáne eshkimniń jumys isteýge qulqy joq tárizdi, aıla-amaldarǵa jol bermeý úshin kimniń tirkelgenin anyqtap, taldaý júrgizý qajet», - dedi Baqytjan Saǵyntaev búgingi Úkimet otyrysynda.
Sondaı-aq, Úkimet basshysy AEA qatysýshylarynyń salyqtyq jeńildikti paıdalanatyndaryn atap ótti.
«Biz «Alataý» ınnovatsııalyq tehnologııalar parki AEA barlyq qatysýshylarynyń kelisimsharttaryna aýdıt júrgizdik. Tolyq aýdıt qorytyndysy boıynsha, óz mindetterin atqarmaıtyn 42 qatysýshymen kelisimshartty buzý jumystary júrip jatyr. Menshik ıelerimen birlesip, ózge de AEA aýmaqtarynda dál osyndaı jumystardy bastadyq», - dedi Jeńis Qasymbek.
Óz sózinde QR IDM basshysy arnaıy ekonomıkalyq aımaqtardyń basty máseleleriniń biri retinde sapaly jobalardyń azdyǵyn, basqarýshy organdardyń jumys tıimdiliginiń tómendigin atap kórsetti.
«Búginde barlyq AEA aýmaǵynda ınfraqurylymy jasaqtalǵan qoljetimdi 1 417 gektar jer bar, olardyń barlyǵyn sapaly jobalarmen toltyrý kerek», - dep basa aıtty mınıstr.
Jarııalanǵan derekterge súıensek, «Ulttyq ındýstrııalyq munaı-hımııa tehnoparki» (UIMHT) arnaıy ekonomıkalyq aımaǵynda 600 gektar, Qaraǵandyda - 270 gektar bos jer bar.
Mınıstr AEA sapaly jobalarmen toltyrý úshin mınıstrliktiń árbir AEA damý strategııasyn ázirlep jatqanyn qosa aıtty. Ulttyq kompanııalar men ákimdikter strategııalyq seriktester tartý boıynsha jumystar júrgizýde.
