QR IDM Mı-2 tikushaǵyna qatysty aqparat taratty
ASTANA. QazAqparat - QR Investıtsııalar jáne damý mınıstrligi Aqmola oblysynyń aýmaǵynda qatty qonǵan Mı-2 tikushaǵyna qatysty aqparat taratty dep habarlaıdy QazAqparat.
Mınıstrliktiń baspasóz qyzmetiniń málimetinshe, 22 qyrkúıekte saǵat 00:40-ta Aqmola oblysyna qarasty Aqkól eldimekeniniń batys jaǵyndaǵy 6 shaqyrym jerde avıatsııalyq oqıǵa boldy. Adam shyǵyny joq.
«Maloaleksandrovka eldi mekeni aýmaǵynan Aqkól eldimekenine ushýdy oryndap, qonýǵa yńǵaılanǵan kezde jerge soǵylǵan tikushaqta ot shyǵyp, áýe kóligi janyp ketken. Qalpyna keltirýge jaramaıdy», delingen habarlamada.
Oqys oqıǵa kezinde bortta bolǵan KVS V.V. Mankov men baqylaýshy ushqysh D.E. Baıbosynov zardap shekken joq. Avıatehnık G.A. Balýevty kúıik shalǵan. Ol qazirgi ýaqytta Aqkól eldi mekeniniń aýrýhanasynda jatyr.
KVS Mankov Vladımır Vladımırovıch tirkeý nómiri «UP MI 212» Mı-2 tikushaǵymen jáne Aqmola avıatobynyń kúshimen Qazaqstan Respýblıkasy Aqmola oblysynyń memlekettik orman qory aýmaǵynda ormanavıatsııalyq jumystardy oryndaǵan.
Aıta keterligi, «Tıan-Shan» ushý ortalyǵy avıatsııalyq kompanııasy 1995 jyly qurylǵan. Avıatsııalyq naryqta avıatsııalyq jumystardy, sonyń ishinde QR aýmaǵyndaǵy ormanavıatsııalyq jumystardy oryndaýǵa mamandanǵan.
«Sońǵy 14 jylda avıakompanııada oqys oqıǵalar tirkelmegen», dep málim etti IDM baspasóz qyzmeti.
