QR IDM komıssııasy Mı-2 tikushaǵynyń apatqa ushyraý sebebin aıtty
ASTANA. QazAqparat - QR Investıtsııalar jáne damý mınıstrliginiń Kólik oqıǵalary men oqys oqıǵalardy tekserý departamenti birneshe avıatsııalyq oqıǵalarǵa qatysty tekserý aıaqtalǵanyn jarııa etti, dep habarlaıdy QazAqparat mınıstrliktiń baspasóz qyzmetine silteme jasap.
Kólik oqıǵalary men oqys oqıǵalardy tekserý departamentiniń málimetinshe, 30 tamyzda shamamen saǵat 11.40-ta Shyǵys Qazaqstan oblysy Shemonaıha aýdany Zevakıno aýylynyń mańynda jeke kásipkerge tıesili «Forsaj-SÝ» motodeltaleti qulady. Motodeltalettiń ushqyshy (ıesi) jaraqat alyp, aýrýhanaǵa jatqyzyldy.
Bul apatty tekserý úshin QR Investıtsııalar jáne damý mınıstriniń buıryǵyna sáıkes tekserý komıssııa quryldy. Tekserý nátıjeleri boıynsha, ushqyshta teorııalyq jáne praktıkalyq tájirıbe bolmaǵany anyqtaldy.
Sonymen qatar, 22 qyrkúıekte Aqmola oblysy Aqkól qalasynda orman-avıatsııalyq jumystaryn atqaryp, qonýǵa bet alǵan kezde «Tıan-Shan» avıakompanııasynyń Mı-2 tikushaǵy qulap, qırady.
Bul oqıǵany tekserý úshin tekserý komıssııa quryldy. Tekserý nátıjeleri boıynsha, tikushaq túnde tóbeshikke soǵylǵan . Bul oqıǵa áýe kemesi komandıriniń qateliginen oryn alǵan.
«Oqıǵaǵa yqpal etken birneshe faktor anyqtaldy. Qubylmaly aýa-raıy kezinde qatty jeldiń tikushaqqa áser etken, ushatyn jerde jaryq bolmaǵan, tútinge baılanysty kórý múmkindigi nashar bolǵan, Aqkól qoný alańynda barometrlik qysym týraly naqty derek bolmaǵan», delingen habarlamada.
