QR IDM komıssııasy «BEK AIR » avıakompanııasy ushaǵynyń apatty jaǵdaıda qoný sebepterin anyqtaıtyn bolady
ASTANA. QazAqparat - «Bek Air» avıakompanııasy ushaǵynyń Astana qalasy áýejaıyna apatty jaǵdaıda qonýynyń sebepterin QR IDM-niń arnaıy komıssııasy zertteıtin bolady.
Bul týraly QR Investıtsııa jáne damý mınıstri Áset Isekeshev málim etti.
Shuǵyl derekterge qaraǵanda, « Bek Air » avıakompanııasynyń «Fokker-100» tıpti áýe kemesi « Qyzylorda-Astana» baǵdarymen reıs oryndaýy barysynda shassıdiń aldyńǵy tireý taǵanynsyz apattyq jaǵdaıda jerge qonǵan, dep habarlady QR IDM baspasóz qyzmeti.
Keste boıynsha ushaq Astanaǵa 09.45-te qonýǵa tıis bolatyn. Alaıda shtattan tys jaǵdaıda órt shyǵý qaýpin meılinshe azaıtý qajet boldy. Osyǵan baılanysty ushaq áýede qosymsha 50 mınýtteı ýaqyt ushyp júrdi. Ol eki ortada Astana áýejaıy órt bolý qaýpiniń aldyn alý maqsatynda ushý-qoný jolaǵyn kóbikke toltyrdy. Qosymsha 7 órt tehnıkasy men 4 jedel járdem mashınasy ázirlendi.
Ushaq 10.36 -da qondy. Ushaq bortynda 116 jolaýshy men 5 ekıpaj múshesi boldy. Japa shekkender joq.
Áýejaıdyń, qalanyń shuǵyl qyzmetteriniń úılesimdi jumysy men áýe kemesi ekıpajynyń joǵary kásibıligin atap ótken lázim.
Qazirgi ýaqytta QR IDM arnaıy komıssııasy quryldy. Zertteý nátıjesi keıinirek habarlanatyn bolady.
