QR IDM Azamattyq avıatsııa komıteti IKAO eskertýleriniń barlyǵyn joıdy
ASTANA. QazAqparat - Búgingi kúnge Komıtet IKAO-nyń eleýli eskertpeleriniń barlyǵyn joıdy. Aldyn ala málimetterge qaraǵanda, IKAO-nyń standarttar men usynylǵan tájirıbesin engizý tıimdiliginiń Qazaqstandaǵy ortasha deńgeıi 65%-dan 74%-ǵa deıin kóteriledi.
Al bunyń búkilálemdik ortasha kórsetkishi 63 paıyz deńgeıinde.
«Uıymnyń belgilengen rásimi boıynsha esep qorytyndysy bıylǵy jylǵy shildede shyǵarylady dep kútilýde. IKAO-nyń valıdatsııalyq mıssııasynyń bıylǵy 29 naýryz-4 sáýirdegi qorytyndysy boıynsha Azamattyq avıatsııa komıtetiniń eksplýatanttar sertıfıkattaryn berý úderisi jónindegi eleýli eskertpesin oıdaǵydaı joıǵandyǵy týraly 2016 jylǵy 20 sáýirde Azamattyq avıatsııa halyqaralyq uıymynyń valıdatsııalyq komıteti sheshim shyǵarǵan bolatyn»,-delingen QR Investıtsııalar jáne damý mınıstrliginiń málimetinde.
Komıtettiń IKAO-nyń eskertpelerin joıǵandyǵy Eýropalyq Odaqtyń Ushý qaýipsizdigi tiziminen (EO elderine ushýǵa tyıym salynǵan álemdegi avıakompanııalarynyń tizimi) qazaqstandyq áýe kompanııalaryn shyǵarý týraly sheshimine oń yqpal jasaıdy dep kútilýde. Qazirgi ýaqytta qazaqstandyq «Eır Astana» avıakompanııasynan ǵana EO elderine ushýǵa shekteýlerdiń barlyǵy alynyp tastalǵan bolatyn.
