QR IDM Astana-Frankfýrt reısiniń keshigý sebebin túsindirdi
ASTANA. QazAqparat - QR Investıtsııalar jáne damý mınıstrligi Astana-Frankfýrt reısiniń keshigý sebebin túsindirdi, dep habarlaıdy «QazAqparat» HAA tilshisi.
«Lufthansa áýe kompanııasynyń Astana - Frankfýrt baǵyty boıynsha LH 649 reısi 2017 jyldyń 3 shildesi kúni 05:05-te ushýy tıis edi. Lufthansa áýe kompanııasynyń ókilderiniń habarlaýynsha, reıs áýe kemesiniń tehnıkalyq aqaýyna baılanysty ushpaı qaldy. Jóndeý jumystaryn júrgizý úshin qosalqy bólshekter men tehnıkter 2017 jyldyń 3 shildesi kúni 23:00-de LH646 reısimen jetedi. Osyǵan baılanysty, áýe kompanııasy LH 649 reısin 2017 jyldyń 4 shildesine, saǵat 02:00-ge aýystyrý týraly sheshim qabyldady», - dep jazdy QR IDM resmı ókili Murat Jumanbaı óziniń Feısbýktegi paraqshasyna.
Keshiktirilgen reıstiń barlyq jolaýshylaryna zańnama talaptaryna sáıkes qyzmet kórsetildi. Olarǵa sýsyndar men ystyq taǵamdar usynyldy jáne jolaýshylardyń bir bóligi Astana qalasynyń qonaq úılerine ornalastyryldy.
