QR IDM apattyq-qutqarý qyzmeti basshysynyń para alý oqıǵasyna qatysty túsinik berdi
ASTANA. QazAqparat - QR Investıtsııalar jáne damý mınıstrligi sybaılas jemqorlyqqa qarsy kúresti júıeli túrde júrgizedi jáne bul máseleni qatań qadaǵalaıdy, sondaı-aq mınıstrlik basshysy jeke baqylaýyna alǵan. Bul týraly atalǵan vedomstvonyń resmı ókili Murat Jumanbaıdyń Feısbýktegi paraqshasynda jazylǵan.
«Biz sybaılas jemqorlyqqa qarsy vedomstvoǵa Indýstrııalyq damý jáne ónerkásiptik qaýipsizdik komıtetiniń vedomstvolyq uıymy bolyp tabylatyn «Kásibı áskerılendirilgen apattyq-qutqarý qyzmeti» sharýashylyq júrgizý quqyǵyndaǵy respýblıkalyq memlekettik kásiporny jumysyndaǵy quqyq buzýshylyqtardy tergeýge tolyq kómek kórsetemiz», delingen habarlamada.
Eske sala keteıik, búgin Sybaılas jemqorlyqqa qarsy is-qımyl ulttyq bıýrosynyń Astana qalasy boıynsha departamenti QR Investıtsııalar jáne damý mınıstrligi «Kásibı áskerılendirilgen apattyq-qutqarý qyzmeti» RMK bas dırektory B.Sh. Halyqty 70 myń AQSh dollary somasynda kezekti para alý barysynda ustaǵanyn habarlaǵan bolatyn.
Kúdikti atqarylǵan jumystar aktisine jyldam qol qoıý úshin merdiger uıymdardan júıeli túrde para alýdyń qylmystyq shemasyn uıymdastyrǵan.
Budan bólek, B.Sh. Halyq bas esepshi K.T.Medebaeva men kásiporynnyń Atyraýdaǵy bólimshesiniń basshysy T.Ý.Mahmutovtyń qatysýymen RMK-nyń iri kólemde qarjysyn jymqyrdy degen kúdikke ilikti.
