QR IDM Almaty áýejaıynda ushaqtar ushyrylýynyń keshiktirilýine baılanysty túsinikteme berdi
ASTANA. QazAqparat - QR Investıtsııalar jáne damý mınıstrligi Almaty áýejaıynda ushaqtar ushyrylýynyń keshiktirilýine baılanysty túsinikteme berdi, dep habarlaıdy QazAqparat.
«Almaty áýejaıyndaǵy reısterdiń keshiktirilýine qatysty aıtar bolsam, qazirgi ýaqytta ushýy keshiktirilgen eshqandaı reıs joq. Barlyǵy da shtatty rejimde jumys isteýde. Tańerteń erte eki reıs aýa raıynyń qolaısyzdyǵyna baılanysty 1 saǵat 30 mınýtqa keshiktirilgen bolatyn. Olar: «Almaty-Óskemen» jáne «Almaty-Semeı» reısteri. Tehnıkanyń barlyǵy da buzylmaǵan, alańdaýǵa esh negiz joq. Qazirgi ýaqytta bul ushaqtar ushyp ketti», - dedi QR Ortalyq kommýnıkatsııalar qyzmetindegi brıfıng barysynda QR IDM baspasóz qyzmetiniń ókili Merýert Ibraeva.
Sonymen qatar ol 5, 7 jáne 8 naýryz kúnderi «Eır Astana» kompanıasynyń ushaqtarynda oryn alǵan tótenshe jaǵdaılarǵa qatysty túsinikte berdi.
«Bul jaıttardy mınıstrlik baqylaýda ustap otyr. Qazirgi ýaqytta tergeý amaldary júrgizilýde. Buǵan deıin habarlaǵanymyzdaı, Investıtsııalar jáne damý vıtse-mınıstri Roman Sklıardyń tóraǵalyǵymen 9 naýryz kúni jedel keńes ótkizilip, oǵan «Qazaq Eır», «Bek Eır» jáne «Eır Astana» áýe kompanııalarynyń ókilderi shaqyryldy jáne «Eır Astana» ókiliniń oryn alǵan jaıttarǵa qatysty tolyq esebi tyńdaldy. Tótenshe oqıǵalarǵa aldyn ala málimetterge sáıkes «Airbus» qozǵaltqyshyndaǵy aqaý sebep bolýy múmkin», - dedi Ibraeva.
