QR IDM alǵash ret jer qoınaýyn paıdalaný quqyn berý boıynsha baıqaý ótkizedi
ASTANA. QazAqparat - 2015 jyly 3 jeltoqsanda QR Investıtsııalar jáne damý mınıstrligi alǵash ret jer qoınaýyn paıdalaný quqyn berý boıynsha baıqaý ótkizedi. Bul týraly atalǵan vedomstvonyń baspasóz qyzmetinen habarlandy.
«Aýktsıon arqyly jer qoınaýyn paıdalaný quqyn berý kezinde jeńimpazdy anyqtaýdyń negizgi ólshemi qatysýshy usynǵan qol qoıylatyn bonýs qunynyń meılinshe úlken bolýyna baılanysty. Al basqa talaptar básekelesti saýdany ótkizý týraly habarlamada tolyǵymen kórsetilgen jáne barlyq qatysýshylarǵa ortaq bolyp tabylady. Bul aýktsıon memleketke ınvestıtsııa tartýǵa múmkindik beredi jáne aýktsıonǵa qatysýshylardan barynsha mol qarjy túsedi jáne qol qoıylatyn bonýstan túsetin qarjy barynsha eselenedi, jeńimpazdy anyqtaýdyń ashyqtyǵyn qamtamasyz etedi»,-dep atap ótilgen mınıstrlik málimetinde.
Atap aıtqanda, Jer qoınaýy týraly Zańda aýktsıondy ótkizýdiń merzimi jáne kezeńderi qatań shektelgen. Bul básekelesti saýda qorytyndylaryn jarııalaýdy eshbir sebepsiz keshiktirýge jol bermeıdi.
Aýktsıonǵa qoıylǵan qatty paıdaly qazbalar boıynsha jer qoınaýy ýchaskeleriniń tizimi (kópshilikke taralǵan paıdaly qazbalardy jáne kómir men ýrandy qospaǵanda) QR Investıtsııalar jáne damý mınıstrliginiń 26.06.2015 jylǵy № 724 buıryǵymen bekitilgen.
Barlyǵy 100 jer qoınaýy ýchaskesi bekitilgen, onyń ishinde 27-si óndirýge jáne 73-i barlaýǵa. Aýktsıonǵa qatysýǵa ótinishter qabyldaý 2015 jyldyń 1 qazanynda aıaqtaldy. Onyń qorytyndysy boıynsha aýktsıonǵa barlyǵy 190 ótinish qatysady.
Ruqsat etilgen ótinishterge sáıkes, jer qoınaýyn paıdalaný quqyn beretin aýktsıon 49 jer qoınaýy ýchaskesi boıynsha júrgiziledi (18-i óndirýge, 31- barlaýǵa).
Aıta keteıik, aýktsıon ótkizý týraly habarlandyrý 2015 jyly 29 tamyzda BAQ jarııalanǵan bolatyn. Ótken jyly «Jer qoınaýy jáne jer qoınaýyn paıdalaný týraly» Zańǵa tıisti ózgerister engizildi.
