QR halyq ártisi Nurjamal Úsenbaeva Pragada altyn músinshe men «Golden Europea» dıplomyna ıe boldy
ASTANA. 11 qarasha. QazAqparat - Qazaqstannyń halyq ártisi Nurjamal Úsenbaeva Eýropa óner odaǵynyń «Golden Europea» joǵary marapatyna ıe boldy,
dep habarlady Abaı atyndaǵy memlekettik akademııalyq opera jáne balet teatrynan.
Saltanatty gala-kontsert Praganyń Rýdolfınýmynda qaterli isikpen aýyratyn balalardy qoldaýǵa jáne olardy jańa tehnologııalarmen jabdyqtalǵan zamanaýı mekemelerde emdeýge qarjy jınaý úshin ótkizildi.
Opera ánshisi elimizge altyn músinshe jáne «Golden Europea» dıplomymen oraldy. Aıta ketken jón, álemde nebári 20 adam ǵana osy marapattyń ıegeri atanǵan. Qaıyrymdylyq gala-kontsertinde Nurjamal Úsenbaeva álemdik opera sahnasynyń juldyzy, barıton daýysty chehııalyq Fılıp Bandjakpen birge Ońtústik Chehııa kameralyq orkestriniń súıemeldeýimen án shyrqady. Dırıjeri - Petr Hromchak.
