QR Energetıka mınıstrliginde qyzmet etetin áıelderdiń teń jartysy turmys qurmaǵan

ASTANA. QazAqparat - QR Energetıka mınıstrliginde 8 naýryz - Halyqaralyq áıelder kúni merekesine oraı uıymdastyrylǵan merekelik shara ótti dep habarlaıdy vedomstvonyń baspasóz qyzmeti.

Vedomstvo basshysy Qanat Bozymbaev mınıstrliktegi áıelder qaýymyn merekemen quttyqtap, myqty densaýlyq, uzaq ómir, ádemilik, mahabbat pen túsinispenshilik, beıbitshilik, ár shańyraqqa jylýlyq jáne tabys, baqyt pen gúldenýdi tiledi. Sonymen qatar áıelder qaýymynyń Qazaqstan Respýblıkasynyń energetıka salasyn damytýdaǵy mańyzdy róli men belsendiligin atap ótti.

QR Energetıka mınıstrliginde basqarýshy qyzmetindegi áıelder qaýymynyń úlesi 42% quraıdy. Jalpy munaı-gaz salasynda eńbek etetin áıelder  úlesi 18% quraıdy. Atom salasynda - 22% (5 369 adam), onyń ishinde 14 áıel basqarýshy laýazymda. Elektr energetıkasy salasynda kórsetkish 27,3%-dy (6189 adam) quraıdy.

QR Energetıka mınıstrliginde (komıtetterdi qosa alǵanda) barlyǵy 220 áıel jáne 196 er adam jumys isteıdi. Er adamdar arasyndaǵy ǵylym doktorlarynyń sany - 2, áıelder arasynda ǵylym doktorlary joq. Alaıda, 1 áıel  - PHD, er adamdar arasynda PHD joq. Er adamdar arasyndaǵy ǵylym kandıdattary - 7, áıelder arasynda - 4. Mınıstrliktiń 220 áıel qyzmetkerdiń 114-i turmys qurǵan, 106-synyń basy bos. QR Energetıka mınıstrliginiń áıel qyzmetkerleri 178 balanyń anasy (Qyzmetker er adamdar - 205 balanyń ákesi). Mınıstrliktiń 65 áıel qyzmetkeri sportpen, 48 shyǵarmashylyqpen aınalysady.

Ótken jyly Mınıstrliktiń 2 áıel qyzmetkeri súbeli úles jáne eńbegi úshin «Ereń eńbegi úshin» medalimen, ekeýi - QR Prezıdentiniń qurmet gramotasymen, tórteýi «Munaı-gaz keshenin damytýǵa qosqan úlesi úshin» medalimen, altaýy «Ekologııa salasynyń úzdigi» tósbelgisimen marapattaldy.