QR Energetıka mınıstrliginde Ekologtar kúnine arnalǵan saltanatty jıyn ótti (FOTO)
ASTANA. QazAqparat - Qazaqstan Respýblıkasy Energetıka mınıstrliginde 3 maýsymda Dúnıejúzilik qorshaǵan ortany qorǵaý kúnine jáne Qazaqstandaǵy Ekologtar kúnine arnalǵan saltanatty jıyn boldy.
Óziniń alǵysózinde energetıka mınıstri Qanat Bozymbaev qorshaǵan ortany qorǵaý zańnamasy salasyndaǵy jańalyqtarǵa toqtalyp ótti, dep habarlaıdy QR EM baspasóz qyzmeti.
«Birtalaı halyqaralyq kelisimderge (Ozon qabaty boıynsha Monreal hattamasy, Kaspıı teńiziniń sý jáne bıologııalyq qoryn saqtaý boıynsha kelisim), ekologııalyq máseleler jáne tómenkómirtekti «jasyl ekonomıka» boıynsha zańdarǵa qol qoıyldy. Bul qol qoıylǵan halyqaralyq qujattar bizdiń ekologııalyq zańnamany jaqsartýǵa múmkindik berdi, budan bylaı halyqtyń qorshaǵan ortany qorǵaýǵa qatysty máseleler boıynsha aqparatqa jáne ádil sotqa qol jetkizýge tolyq múmkindigi bar dep aıtýǵa bolady. Ekologııa jáne tabıǵatty paıdalaný máseleleri boıynsha qabyldanatyn sheshimderdiń ashyqtyǵy qamtamasyz etildi. Ekologııaǵa tikeleı qatysy bar jobalardy iske asyrý barysynda zańnamalyq deńgeıde mindetti túrde qoǵamdyq keńesti ótkizý sharasy bekitildi. Sonymen qatar Parnıktik gazdardyń shyǵaryndylaryna kvotalardy bólý jónindegi ulttyq jospardy qalyptastyrý boıynsha engizilip jatqan ózgerister parnıktik gazdardyń shyǵaryndylaryna tıimdi kvota bólý júıesin jáne kvotanyń ishki saýdasyn engizýge múmkindik beredi», - dep atap ótti Qanat Bozymbaev.
Saltanatty jıyn barysynda mınıstrliktiń qyzmetkerleri, úkimettik emes uıymdardyń jáne BAQ ókilderi, ǵylym qyzmetkerleri, ustazdar jáne joǵary oqý oryndarynyń stýdentteri jáne t.b. qorshaǵan ortany qorǵaý máselelerine belsendi qatysqany úshin qurmet gramotalarymen, alǵys hattarmen jáne «Ekologııa salasynyń úzdigi» vedomstvolyq medalimen marapattaldy
Dúnıejúzilik qorshaǵan ortany qorǵaý kúni qorshaǵan ortany qorǵaý jáne jaqsartý qajettiligin qoǵamnyń sanasyna tereńirek uǵyndyrý maqsatynda BUU Bas assambleıasymen 1972 jyldyń 15 jeltoqsanynda bekitilgen bolatyn.
Ótkizý kúni 5 maýsymǵa belgilendi, oǵan sebep, dál osy kúni Adamnyń qorshaǵan ortasy máseleleri boıynsha BUU-nyń konferentsııasy ashylǵan edi (Stokgolm, 1972 jyl), konferentsııadan keıin Qorshaǵan ortany qorǵaý boıynsha BUU-nyń baǵdarlamasy quryldy (ıÝNEP).
