QR Energetıka mınıstrligi: Reseı benzınine tyıym salý - janar-jaǵarmaı baǵasyna áser etpeıdi
ASTANA. QazAqparat - QR Energetıka vıtse-mınıstri Maǵzum Myrzaǵalıev Reseıden jetkiziletin munaı ónimderiniń ımportyna ýaqytsha tyıym salýdyń basty sebepterin atady.
"Bizdiń munaı óńdeý zaýyttarymyzda jańǵyrtý júrýde. 2016 jyly ol jumys aıaqtalady dep kútilýde. Oǵan deıin bizdiń naryqta joǵary oktandy janar-jaǵarmaı men dızel otyny jetispeýshilik baıqalýda jáne ádette Reseı Federatsııasynan jetkiziletin ımporttyń esebinen tolyqtyrylyp keledi. RF ımporttalatyn jetispeıtin otyn kólemi boıynsha qarym-qatynas Qazaqstan men Reseı arasyndaǵy Indıkatıvti balans negizinde retteledi. Aǵymdaǵy jyly Indıkatıvti balans erejesine sáıkes, Qazaqstannyń ishki naryǵyna jetispeıtin otyn kólemin tolyqtyrý úshin Reseıden ımporttalatyn avtokólik benzıniniń kólemi 1 mln. 100 myń tonnany, al dızel otyny 520 myń tonnany quraıdy. Atalmysh otyn kólemin Reseıden Qazaqstanǵa jetkizý bekitilgen grafıkke sáıkes kúntizbelik, aımaqtyq jáne taǵy basqa jyl saıynǵy elimizde otyndy paıdalaný joramaly boıynsha aı saıynǵy merzimge josparlanǵan", - dedi ol tilshilerge bergen baspasóz máslıhatynda.
Onyń aıtýynsha, 2015 jyldyń eki aıynda ımporttalǵan benzın kólemi jospardan asyp túsken. Bul degenimiz - ındıkatıvti balansqa baılanysty jyldyń sońynda janar-jaǵarmaı jetkizilmeı qalýy yqtımal.
"2015 jyldyń qańtar aıynda Indıkatıvti balansqa sáıkes, Qazaqstanǵa Reseıden 90 myń tonna benzın jetkizý josparlanǵan bolatyn, al is júzinde 180 myń tonna benzın ákelindi. Aqpan aıynda atalǵan jaǵdaı taǵy da qaıtalandy. Josparlanǵan kólem 80 myń tonnany qurasa, ákelingen kólem 140 myń tonnany qurady. Nátıjesinde, 2015 jyldyń qańtar jáne aqpan aılarynda Qazaqstan Respýblıkasyna balansqa sáıkes bekitilgen jospardan tys 150 myń tonna benzın ımporttaldy. Atalǵan jospardan tys Indıkatıvti josparǵa engiziledi, al bul 2015 jyldyń sońyna deıingi Reseıden ákelinetin otyn kóleminiń grafıgine óz áserin tıgizetindigin atap ótý kerek", - dedi ol.
"Kólik ıelerin mazalap júrgen bir saýal baryn bilemiz, Reseıden munaı ónimderin jetkizýge engizilgen ýaqytsha tyıym kóp qoldanylatyn benzın baǵasyna (Aı-92, Aı-80) jáne dızel otynyna keri áserin bermeıdi", - dedi ol.
Eske sala keteıik, atalmysh tyıym 5 naýryzdan bastap engizildi jáne 45 kúnge sozylady.
