QR Energetıka mınıstrligi Pýtınniń Qazaqstanda AES salý usynysyna pikir bildirdi

NUR-SULTAN. QazAqparat - QR Energetıka vıtse-mınıstri Maǵzum Myrzaǵalıev Qazaqstanda atom elektr stansasyn salý týraly usynysqa túsinik berdi, dep xabarlaıdy QazAqparat tilshisi.

«AES qurylysy boıynsha sheshim bizde qabyldanǵan joq. Ázirge biz tek onyń alańyn aıqyndadyq. Biz qolaıly tehnologııany irikteımiz. Osy oraıda tıisti talqylaýlar júrgiziledi», - dedi vıtse-mınıstr Senatta tilshiler saýalyna jaýap bere otyryp.

Onyń atap ótýinshe, AES qurylysy máselesi qosymsha zertteýlerdi talap etedi.

«Biz osy máseleni pysyqtaýdy jalǵastyramyz, alaıda AES qurylysyna qatysty naqty sheshim qabyldanbady. Onyń alańy retinde Almaty oblysyndaǵy Úlken aýyly aıqyndalǵan edi», - dedi ol.

Esterińizge sala keteıik, QR Prezıdenti Qasym-Jomart Toqaevtyń RF-ke resmı sapary barysynda Reseı Prezıdenti Vladımır Pýtın eki eldiń arasyndaǵy energetıkalyq saladaǵy yntymaqtastyqty keńeıtýdi jáne Qazaqstanda AES qurylysyn reseılik tehnologııamen júrgizýdi usyndy.

«Beıbit atom salasynda yntymaqtastyq damyp keledi, ýrandy óndirý men baıytý boıynsha qazaqstandyq-reseılik alty kásiporyn jumys isteýde. Ózara is-qımyldyń jańa formatyna kóshýdi, osy oraıda reseılik tehnologııalarmen AES salý múmkindigin usynamyz», - dedi V. Pýtın.