QR Energetıka mınıstrligi KQK-ǵa jasalǵan kezekti dron shabýyly týraly pikir bildirdi
ASTANA. KAZINFORM – Reseı Qorǵanys mınıstrligi Kaspıı qubyr konsortsıýmynyń (KQK) «Kropotkınskaıa» munaı aıdaý stantsııasyna drondarmen jasalǵan taǵy bir shabýyl týraly habarlady.

Bul jaǵdaıǵa Qazaqstan Respýblıkasynyń Energetıka mınıstrligi túsinikteme berdi.
- 24 naýryzda túngi saǵat 2.00 shamasynda Krasnodar ólkesindegi Kaspıı qubyr konsortsıýmynyń (KTK) «Kropotkınskaıa» munaı aıdaý stantsııasyna ushqyshsyz apparattar arqyly shabýyl jasaldy, – delingen Reseı Qorǵanys mınıstrliginiń habarlamasynda.
Óz kezeginde QR Energetıka mınıstrligi KQK-nyń qazaqstandyq munaıdy qabyldaýy eshqandaı shekteýsiz jalǵasyp jatqanyn málimdedi.
Aıta keteıik, buǵan deıin 17 aqpanda «Kropotkınskaıa» stantsııasyna dron shabýyly jasalǵan bolatyn.
Sonymen qatar, 19 naýryzda reseılik BAQ pen Telegram-arnalar KQK ınfraqurylymyna taǵy bir shabýyl jasalǵany týraly habarlaǵan edi.