QR Energetıka mınıstri MAGATE-de sóz sóıledi
ASTANA. QazAqparat - QR Energetıka mınıstri Q.Bozymbaev MAGATE-de ıadrolyq qarýdy taratpaý jáne atomdy beıbit maqsatta qoldaný salasyndaǵy Qazaqstannyń jetistikteri týraly sóz sóıledi, dep habarlaıdy QazAqparat.
Qazaqstan delegatsııasynyń basshysy Energetıka mınıstri Qanat Bozymbaev MAGATE-de sóılegen sózinde ıadrolyq qarýdy taratpaý rejimin nyǵaıtý boıynsha Qazaqstan Prezıdenti N. Nazarbaevtyń jahandyq bastamalaryna, ıadrolyq energııany beıbit maqsatta qoldaný salasyndaǵy MAGATE men Qazaqstan Respýblıkasy arasyndaǵy yntymaqtastyqtyń jaǵdaıy men bolashaǵyna basa nazar aýdardy.
2018 jyldyń 17 qyrkúıeginde Venada Atom energııasy boıynsha halyqaralyq agenttigi Bas konferentsııasynyń (MAGATE) 62-shi sessııasy óz jumysyn bastady.
Bas konferentsııanyń jumysyna Energetıka mınıstri Qanat Bozymbaev bastaǵan Qazaqstan delegatsııasy qatysyp jatyr.
Qazaqstandyq tarap sessııa aıasynda MAGATE maqsatyn júzege asyrýdaǵy Qazaqstannyń róline arnalǵan slaıd-ıvent uıymdastyrdy. Іs-sharaǵa Uıymnyń múshe-memleketteri delegatsııalarynyń basshylary qatysyp, ıadrolyq qarýdy taratpaý, ıadrolyq energııany beıbit maqsatta paıdalaný jáne jahandyq ıadrolyq qaýipsizdikti nyǵaıtý boıynsha Qazaqstannyń kúsh-jigerin joǵary baǵalady.
Qazaqstan delegatsııasynyń basshysy Saýd Arabııa Koroldiginiń Energetıka jáne ónerkásip mınıstrimen, Saýd Arabııasy korol Abdalla atyndaǵy Atom jáne jańǵyramaly energııa jónindegi akademııalyq qalashyǵynyń prezıdentimen, Qytaı Atom energııasy agenttiginiń tóraǵasymen, Úndistan Atom energııasy komıssııasynyń tóraǵasymen, Ýkraına Energetıka jáne kómir ónerkásibi mınıstriniń birinshi orynbasarymen jáne «Rosatom» atom energııasy boıynsha memlekettik korporatsııasynyń bas dırektorymen ekijaqty kezdesýler ótkizdi.
MAGATE Bas konferentsııasynyń jumysy 21 qyrkúıekke deıin jalǵasady. Osy is-shara aıasynda 140-ten astam múshe-memlekettik delegatsııalary MAGATE jyl saıynǵy baıandamasyn jáne ıadrolyq qaýipsizdik týraly baıandamany, sondaı-aq Agenttiktiń esebin, baǵdarlamasy men bıýdjetin qaraıdy.
