QR elshisi men Túrkııa mınıstri Qazaqstan Prezıdentiniń saparyn talqylady
ASTANA. QazAqparat - Qazaqstannyń Túrkııadaǵy Tótenshe jáne Ókiletti Elshisi Janseıit Túımebaev Túrkııanyń syrtqy ister mınıstri Mevlıýt Chavýshoǵlymen kezdesti.
Júzdesý barysynda QR Prezıdenti Nursultan Nazarbaevtyń Ankaraǵa resmı sapary, qazaq-túrik qarym-qatynasynyń jaı-kúıi, bolashaǵy talqylandy, dep habarlaıdy elshiliktiń baspasóz qyzmeti.
Eki elshiniń áńgimesi túrik-orys qatynasyn retteýde úlken ról atqarǵany úshin N.Nazarbaevqa túrik elshisiniń alǵys bildirýimen bastaldy.
Sapar baǵdarlamasy talqylanǵan soń, M.Chavýshoǵly Túrkııa úshin jaqynda ǵana BUU QK turaqty emes múshesi bolyp saılanǵan baýyrlas respýblıkanyń joǵary delegatsııasyn kútip alý mártebe ekenin jetkizdi. «Bul - N.Nazarbaevtyń ishki jáne syrtqy saıasatynyń arqasynda Qazaqstannyń halyqaralyq arenada bedeli zor ekendigin bildiredi», dedi ol.
J.Túımebaev mınıstrdiń jyly lebizine alǵys bildire otyryp, eki eldiń saıası, ekonomıkalyq, mádenı baılanysy damýynyń negizgi baǵyttaryna toqtalyp ótti. Táýelsizdik alǵan tusta Qazaqstan men Túrkııa arasynda ornaǵan qarym-qatynas qarqyndy damyp keledi. Mysal retinde elshi jaqynda ǵana ótken Túrkııadaǵy Qazaqstan kúnderin, Súıinbaı Aronulynyń músini qoıylǵanyn, Jambyl Jabaevtyń 170 jyldyǵyna oraı uıymdastyrylǵan konferetsııany, QR óner qaıratkerleriniń qatysýymen ótken kontserttik baǵdarlamany aıtty.
Sonymen qatar, túrik mınıstri saıyn dalada jańa astananyń - zamanaýı ásem qalanyń turǵyzylýy - N.Nazarbaevtyń der kezinde qabyldaǵan sheshimi ekenin aıtty. «Baýyrlas qazaq elin Astana kúnimen quttyqtaımyn, zor jeńister tileımin», dep túıindedi M.Chavýshoǵly. 
