QR Elshisi Makedonııa Premer-mınıstrimen kezdesti
ASTANA. QazAqparat - Keshe,12 qazanda Skope qalasynda Qazaqstan Respýblıkasynyń Makedonııa Respýblıkasyndaǵy Tótenshe jáne Ókiletti Elshisi mindetin qosa atqarýshy Nurbah Rústemov Makedonııa Premer-mınıstri Zoran Zaevpen kezdesti jáne Qazaqstan-Makedon qarym-qatynastarynyń jaı-kúıi men damý keleshegi talqylady.
Taraptar ekijaqty qarym-qatynastardy jandandyrýǵa, jańa ózara taýar aınalymynyń kólemderin ulǵaıtýǵa jáne kelisimderge qol qoıý arqyly sharttyq-quqyqtyq bazany keńeıtýge múddelik bildirdi.
Atalǵan kezdesýde eki eldiń saýda salasyndaǵy jáne iskerlik baılanystaryna serpin berýge tıis ekijaqty úkimetaralyq ekonomıkalyq yntymaqtastyq jónindegi komıssııa qurý qajettigi atap ótildi.
Zoran Zaev 2018 jyly Astana Ekonomıka forýmynyń jumysyna qatysýǵa qyzyǵýshylyq bildirdi.
Makedondyq premer-mınıstr quqyq salasyndaǵy yntymaqtastyqqa ázirligin rastady. Úkimet basshysy makedon tarapy jarty jylda bir ret úsh aıǵa deıingi merzimde Makedonııaǵa keletin Qazaqstan azamattary úshin vızasyz rejım engizý praktıkasyn jalǵastyratynyn atap ótti.
Qazaqstan Elshisi áńgimelesýshini Qazaqstannyń syrtqy saıası jáne halyqaralyq bastamalarymen, respýblıkamyzdyń damý baǵdarlamalarymen, sheteldik ınvestorlar úshin ınvestıtsııalyq preferentsııalarmen, Astanada ótkizilgen EKSPO-2017 halyqaralyq kórmesiniń qorytyndysymen tanystyrdy, sondaı-aq «Astana» halyqaralyq qarjy ortalyǵy qurylǵandyǵy týraly habardar etti.
Sonymen qatar, Elshiniń Makedonııa Syrtqy ister mınıstrliginiń basshylyǵymen kezdesýi boldy.
Júzdesýlerde makedon tarapy ekijaqty qarym-qatynastardyń barlyq salasy boıynsha Qazaqstanmen yntymaqtastyqty damytýǵa múddeligin bildirdi.
