QR EQSJQA-da árbir aımaq boıynsha sybaılas jemqorlyq qaýipteriniń tólqujaty jasaldy
ASTANA. 7 jeltoqsan. QazAqparat - Qarjy polıtsııasy organdarynyń jedel-tergeý tájirıbesi kórsetkendeı, memlekettik satyp alý salasy sybaılas jemqorlyqqa beıim salalardyń biri bolyp qalyp otyr.
Bul týraly QR Ekonomıkalyq qylmysqa jáne sbaılas jemqorlyqqa qarsy kúres agenttiginiń baspasóz qyzmeti Sybaılas jemqorlyqpen kúrestiń halyqaralyq kuni qarsańynda habarlady.
Memlekettik satyp alýlar arqyly áleýmettik obektiler salynady jáne memlekettik áleýmettik baǵdarlamalar júzege asyrylady. Sondyqtan Qarjy polıtsııasy agenttigimen osy baǵdarlamalardyń iske asyrylýyna bólingen bıýdjettik qarajattyń tıimdi paıdalanýyna basa nazar aýdarylady.
Ol úshin Agenttikte ár aımaqtyq sybaılas jemqorlyq qaýipterdiń tólqujattary jasalǵan.
Tólqujattarda áleýmettik obektilerdiń asa mańyzdylary, olardyń ataýlary, merdigerler, aıaqtaý merzimderi men obektiniń jalpy baǵasy kórsetilgen.
Osy tólqujattardyń negizinde turaqty túrde monıtorıng pen jedel súıemeldeý júrgizý arqyly árbir obekt boıynsha aqparat jınalady.
Aǵymdaǵy jylǵy 10 aıda osy salada 308 sybaılas jemqorlyq qylmystar anyqtaldy, zalal somasy 286 mln. teńgeni qurady, 103 mln. teńge qaıtaryldy.
Osy baǵyttaǵy jumysty tıisti deńgeıde uıymdastyrý úshin zańnama men jedel-tergeý tájirıbesi saralandy. Osynyń negizinde Úkimetke bul saladaǵy zańnamany jetildirý boıynsha usynystar joldandy.
Sonymen qatar aýmaqtyq bólimderdiń aldyna memlekettik organdarmen júrgizilip otyrǵan tenderlerge baqylaýdy kúsheıtý boıynsha mindet qoıyldy. Tıisti bólim sybaılas jemqorlyq qaýipterdiń tólqujattaryna engizildi.
